Pas marrëveshjes së arritur midis kryeministrit Edi Rama dhe kreut të Partisë Demokratike, partitë e vogla rrezikojnë të dalin nga skena politike. Për këtë arsye, drejtuesit e tyre kanë dhënë alarmin se ky është një kompromis që dëmton pluralizmin.
Nisur nga sinjalet që kanë dhënë liderët e dy forcave kryesore në vend se mund të bashkëqeverisin pas zgjedhjeve parlamentare të 25 qershorit, partitë e vogla mund të bëhen të panevojshme për një koalicion pas zgjedhor.
Partitë e tilla si Lëvizja Socialiste për Integrim (edhe pse me një elektorat të konsoliduar), partia për Drejtësi, Integrim dhe Unitet, partia Agrare Ambientaliste, partia LIBRA e Ben Blushit, partia Demokristiane e Nard Ndokës e shumë forca të tjera politike rrezikojnë të mos fitojnë mandate deputetësh në zgjedhjet e 25 qershorit.
Duke iu referuar kësaj marrëveshjeje, aleatët e kreut demokrat Lulzim Basha kanë dkërkuar që të garojnë nën siglën e kësaj force politike për të pasur një vend të sigurt në Parlament dhe për të bërë të mundur ekzistencën e tyre politike.
Një nga partitë që mund të reduktohet ndjeshëm në raport me elektoratin e saj është Lëvizja Socialiste për Integrim e cila do të jetë e vetme në fushatën elektorale përballë Partisë Socialiste dhe Partisë Demokratike.
Megjithatë, zgjedhjet parlamentare të 25 qershorit dhe koha pas saj do të tregojnë realisht nëse marrëveshja Rama-Basha dhe bashkëqeverisja e mundshme midis tyre, do të përjashtojë nga skena politike, partitë e vogla shqiptare.
“Tirana Today” ka përzgjedhur reagimet më domethënëse të krerëve të partive të vogla dhe përfaqësuesve të tyre, që pas marrëveshjes Rama-Basha.
REAGIMET E PARTIVE TË VOGLA
Petrit Vasili, kryetar i LSI-së: Është një privim anti-kushtuetues që i ndalon partitë për të mos garuar në koalicion. Kjo marrëveshje ka shumë detaje që duhet të ketë sqarime të mëtejshme. Pra, duhet shpjeguar pasi ka shumë momente. Për mua marrëveshja i prish standardet e zgjedhjeve, por megjithatë, le ta vendosin qytetarët më 25 qershor.
Mesila Doda, deputete e PDIU: Partitë e vogla kanë për të marrë sërish mandatet që i kanë marrë edhe më parë, ndoshta këtë herë si te vetëm do t’i marrin me vështirësi por sërish do ti marrin. Ideja e lokomotivave dhe vagonëve është diçka më shumë sesa diktatoriale. Jemi të detyruar që të futemi në koalicione. PD dhe PS marrin votat e partive të vogla sikur të ishin banda. Vota është çështje sentimenti, PS de PD po bëjnë pazare dhe po sillen si të rëndomtë. Marrëveshja është një Pazar i pastër.
Dashamir Shehi, kreu i LZHK-së: Kjo marrëveshje është një mundësi për të provuar të gjitha partitë veten e tyre se sa e kanë forcën. Në qofte se stabiliteti i Shqipërisë do puqet pas zgjedhjeve, unë jam dakord të bashkëpunojnë. Këto variante përdoren nga të gjitha vendet evropiane dhe nuk ka asgjë të keqe. Është një mundësi e mirë, të gjitha partitë dalin me programet e tyre, ka shumë parti që nuk dihet çfarë programi kanë pasi humbasin në programet e partive të mëdha. Ndërsa lidhur me demokracinë brenda vendit një nga problemet e Shqipërisë së këtyre 4 viteve ishin banditët brenda Parlamentit të cilët dolën dhe do të dalin deri në shtator. Gjithashtu, duhet ndryshuar edhe Kushtetuta e vendit pasi kemi nevojë.
Skënder Gjinushi, kreu i PSD-së: Nuk është zgjidhur juridikisht. Është një marrëveshje politike që shkel kodin dhe një hile e madhe politike, pasi nuk mund të përjashtohen koalicionet. Kjo është një e drejtë universale dhe këtu flitet për një lojë politike që nuk shkon. Unë nuk e di se me çfarë baze Presidenti do të shtyjë zgjedhjet me 1 javë.
Ben Blushi, kreu i LIBRA-s: Lajm i mirë që PD futet në zgjedhje. Marrëveshja që është bërë nuk është për cilësinë e zgjedhjeve por për bashkëqeverisje. PD ndenji në çadër për të marrë doganat hipotekat dhe ALUIZNI-n. Kjo që bëri PD është nevojë për të ndarë para publike.. Marrëveshja është një amnisti ndaj të korruptuarve. Qeveria e Shqipërisë u nda si plaçkë. Partia Demokratike kërkonte të ishte në qeveri pa zgjedhje, ajo u fut në qeveri për të qeverisur me PS dhe LSI-në. Qeveria u nda në tre pjesë, dikush mori dogana, dikush arsimin, dikush burgjet, dikush energjinë, dikush hipotekat, dikush mori Aluizmin. Kjo është marrëveshja që është mbajtur sot, marrëveshje për bashkëqeverisje. Shqipëria nuk ka votuar për këtë bashkëqeverisje.
Agron Duka, kreu i PAA-së: Të gjithë partitë kanë të drejtë të vendosin vetë nëse mund të hyjnë ose jo me PD-në. Duhen matur forcat. Kjo marrëveshje i dëmton partitë e vogla. Ky Kod Zgjedhor është bërë për të pasur koalicione, prandaj ne duhet ta masim mirë veten nëse mund të nxjerrim deputetë apo jo. Në këto kushte ku nuk ka numërues, mund të kemi pretendime në 2 ose 3 qarqe. Do shohim nëse mund të konkurrojmë vetë apo jo. Unë gjykoj në Durrës e marr 1 mandat, nëse ky mandat nuk shoqërohet me të tjerë, atëherë mbetet për t’u parë. Po shoh mundësinë nëse ne mund të masim forcat nën siglën e PAA-së. Por, penalizuese është sa të duash. Në radhë të parë jam shumë i kënaqur që u arrit marrëveshja, në kushtet që ishim në një greminë ndoshta, unë gjykoj që Basha ishte i detyruar të pranonte datën nga Rama. Më e mira është që të gjitha partitë do marrin pjesë në zgjedhje.
Nard Ndoka, kreu i PDK-së: Kuptohet që është një marrëveshje problematike. Ishte drejt një lufte ose një realiteti tjetër politik. Ishte e vetmja mundësi, pra do të orientohemi gjithsecili me selitë tona. Basha ka pasur kontakte të vazhdueshme me ne, besoj se kjo nuk është zgjidhja më e mirë, duhet të jemi realistë për atë që ndodhi. Ndalimi i koalicioneve është një goditje për pluralizmin dhe partitë e vogla politike, por ndodhemi në këtë ngjarje, që besoj se do zgjidhet. Ne aleatët e PD-së jemi më tepër te mishi se te ngjalat.
Gjergj Bojaxhi, SFIDA për Shqipërinë: Rama, Meta e Berisha tashmë po bashkëqeverisin dhe ia arritën qëllimit. Pazaret e dy netëve më parë i ngjanin më shumë takimeve të “Cosa Nostra-s” sesa asaj të një Republike Parlamentare. Pa dëshmitarë, duke lëvizur nga dhoma në dhomë për të shmangur përgjuesit, aty u vendos si duan ta katranosin sërish drejtësinë apo si do ndahen koncesionet, cila dosje të rënda do hapen dhe cilat do varrosen përfundimisht, cili politikan do shpëtojë e cili jo. Administrata është ndarë si plaçkë mes hajdutësh dhe vota sot nuk është as më e sigurt as më e lirë.
(TIRANA TODAY)
