Nga kryeministria, në sallën e Hartave, pjesërisht e dëmtuar nga tërmeti, kryeministri Rama ka dhë një mesazh të qartë dhe të prerë për të gjithë. Kjo është hera e fundit që shteti shqiptar do të ndërtojë shtëpi falas.
“Ne do të bëjmë një transformim që do të kalojë në një fazë të re të Rilindjes Urbane dhe sociale. Do zbuloj një rrugë që të jetë rruga e së ardhmes dhe jam i bindur që jo vetëm ne, qeveria jonë në mandatin tjetër, por dhe të tjerë më pas do ta kenë këtë pjesë të programit”, tha Rama.
Për më tepër, kryeministri tha se do të ketë masa të reja shtrënguese për ndërtimet pa leje.
“Ne do të shtrëngojmë shumë fort ndërtimin pa leje. Kush ndërton pa leje duhet të dënohet shumë fort për banesë individuale. Kush merr leje për një ndërtim, duhet të dënohet edhe më fort nëse shkel lejen, por jo vetëm që të dënohet ai që shkel lejen por do të vendoset dënimi për arkitektin, konstruktorin dhe dënimi për supervizorin, sepse nuk bëhet kjo me polici ndërtimore duke e gjurmuar me polici nga mbrapa. Kjo bëhet duke ndërtuar një sistem. Këta njerëz duhen vënë në përgjegjësi para ligjin, që të mos e lënë njëri-tjetrin të bëjnë shkelje”, shtoi ai.
Sipas kreut të qeverisë shteti do të ndërtojë shtëpitë e të dëmtuarve nga tërmeti pa i marrë askujt lekë, por do të jetë hera e fundit, pasi sigurimet do të bëhen të detyrueshme.
“Dhe tjetra, nuk mundemi dot më të përballojmë fatkeqësitë duke drejtuar shteti. Kjo është hera e fundit që shteti do të bëjë gjithçka dhe nuk do të kërkojë asnjë lek nga askush. Sigurimi i detyruar nga fatkeqësitë duhet të bëhet një normë. Normalisht, shteti duhet të marrë përsipër të sigurojë ata që janë të varfër ndërsa të tjerët duhet të paguajnë sigurimet. Sigurimet janë detyrime ndaj vetes dhe familjes. Sa herë hapen këto muhabete bërtasin ja ky na mbyti me taksa në kohën që unë kam ulur taksa më shumë se kushdo tjetër më parë, por de fakto ne jemi në një fazë adoleshente në raport me shtetin. Ne e duam shtetin por për të tjerët. Të ketë shtet për të tjerët, jo për mua. Secili e do shteti për të tjerët dhe shumë pak është i gatshëm ta fillojë nga vetja në raport me shtetin”.
Kryeministri tha se rindërtimet në fshatra do të bëhen të grupuara.
“Njerëzve në fshat t’u japim shtëpi që as nuk i kanë imagjinuar për shkak të varfërisë dhe të mundohemi që t’i afrojmë me njëri-tjetrin. Të çlirojmë tokat. Nuk do të prekim as një centimetër tokë por do t’i detyrojmë të shembin gërmadha dhe të marrin një shtëpi pranë qendrës. Sepse është krim që fëmijët të rriten të izoluar nga njëri-tjetri nëpër cepa ku kanë mbetur prej shekujsh dhe të bëjnë nga 20 km në ditë për të shkuar në shkollë, ndërkohë që shtëpia afrohet”, tha Rama.
