Kreu i grupit parlamentar të Partisë Socialiste, Taulant Balla, është shprehur se Partia Socialiste do të mbledhë drejtuesit politik të qarqeve çdo javë, deri më 25 prill, ditë kur do të zhvillohen edhe zgjedhjet parlamentare të vitit 2021. Numri 2 i PS, Taulant Balla, u shpreh se është vendosur që ky takim të jetë i përjavshëm.
Gjithashtu bëri të ditur se do të krijohet një kanal komunikimi virtual në anëtarësinë e PS, për të vlerësuar performancën e çdo deputeti dhe ministri.
“Interesimi juaj dhe i qytetarëve është pa dyshim këtu, ku është e sotmja dhe e ardhmja. Së pari dua t’ju them se ky takim i përjavshëm do të vijojë deri më 25 prill.
Diskutuam mbi çështjet organizative. I dorëzuam kryeministrit një përmbledhje të vlerësimeve që burojnë nga qytetarët.
Diskutuam për krijimin e një kanali komunikimi virtual me anëtarësinë e partisë, për të vlerësuar performancën e çdo deputeti dhe çdo ministri.
Ky kanal do të jetë i dedikuar për kontributin e çdo qytetari. Janë ata që e vlerësojnë dhe kontribuojnë në përmirësimin tonë. E mirëpresim”, u shpreh Balla.
