Kanë dalë nga SPAK gazetari Artan Hoxha dhe kryebashkiaku i Bulqizës, Lefter Alla të cilët dhanë dëshminë e tyre në lidhje me videon e publikuar dje.
Artan Hoxha ka dalë nga ky institucion pas pothuajse 2 orësh, teksa ka dhënë edhe një prononcim për mediat e pranishme. Gazetari tha se ka thënë gjithçka për çfarë është në dijeni për videon, ku ka shpjeguar dhe mënyrës se si e mori atë.
“I dorëzova materialin filmik prokurorisë. Dhashë shpjegimet e mia për videon. Pres që SPAK të jetë në pritshmërinë e shqiptarëve. Kjo nuk është politike. Nuk më lidhin dot mua me Babale1 apo Babale 2. Unë nuk kam asnjë problem me personin si individ, por me fenomenin. Nuk besoj që ndonjë shqiptar beson se unë dhe Sali Berisha kemi bashkëpunime. Jam i gatshëm për çdo nevojë që do të ketë SPAK, të ndihmoj me informacionin që kam. Nuk vendos unë nëse ka vepër penale por institucionet e drejtësisë. Kemi disa vite që artikulojmë në media, që kemi drejtues të niveleve të larta, që marrim vendime për shqiptarët, nën efektin e lëndëve narkotike. Detyra jonë është të informojmë publikun dhe të jemi syri e veshi për publikun”, tha ai.
Ndërkohë, Lefter Alla i cili ndenji në SPAK për rreth 1 orë e 30 minuta, nuk pranoi që të fliste për mediat.
