Një ditë pas firmosjes së dekretit për të shfuqizuar datën e zgjedhjeve vendore, Ilir Meta, sikundër kishte paralajmëruar, ka mbajtur ditën e sotme një konferencë për mediat.
Gjatë fjalës së tij, presidenti ka deklaruar se Rama duhet të tregonte më shumë fleksibilitet, pasi është kryeministër i vendit, e për pasojë mbi të rëndojnë shumë përgjegjësi.
Meta, edhe një herë tjetër theksoi arsyet pse mori vendimin për të anuluar zgjedhjet, ndërsa e cilësoi këtë akt, një përpjekje kurajoze për të hapur negociatat me Bashkimin Evropian.
Po ashtu, presidenti shtoi se nuk kishim nevojë për viktima në protestën e tetë kombëtare organizuar nga opozita jo parlamentare, ndërsa e konsideroi kërkesën e Partisë Socialiste për shkarkimin e tij, shantazh dhe presion që i bëhet institucionit më të lartë, kryetarit të shtetit.
“Është një përpjekje mjaft kurajoze për të ecuar në rrugën e BE-së. Në rast se do të kishte ndodhur diçka në datën 8 apo më pas, të tjerët do thoshin: shumë vonë zoti president. Nuk kemi më nevojë për viktima, nuk duhet të ekzistojnë në një shoqëri demokratike”, deklaroi Meta.
