Mbretëria e Bashkuar është tashmë vendi me numrin më të lartë të viktimave nga koronavirusi në Evropë.
Të dhënat e fundit të publikuara nga autoritet zyrtare tregojnë se, më shumë se 32 mijë persona në MB kanë humbur jetën nga ky virus.
Sipas zyrës së statistikave kombëtare, deri më 27 prill në Angli dhe Uells janë regjistruar 29,648 viktima. Me vdekjet shtesë në Skoci dhe Irlandën Veriore, kjo e çon bilancin e Britanisë së Madhe në 32,313 sipas përllogaritjeve të Reuters.
Kështu Mbretëria e Bashkuar lë pas edhe Italinë e cila që prej fillimit mbante kryesimin me vdekjet më të shumta në Evropë. Deri më tani Italia ka regjistrua mbi 29 mijë viktima.
Ndërkohë në rang botëror, MB renditet e dyta pas SHBA-ve për numrin më të madh të viktimave.
Ministrat dhe ekspertët britanikë kanë paralajmëruar që të mos bëhen krahasime ndërkombëtare, ndërkohë që mendojnë se Britania e Madhe e ka kaluar tashmë pikun e infektimeve.
Për të parën herë, javën e kaluar, qeveria nisi të përfshinte të dhënat për vdekjet jashtë spitaleve, në rastet kur njerëzit kishin rezultuar pozitivë për koronavirusin në bilancin e përditshëm të viktimave të virusit.
Më shumë se 3,6 milionë njerëz nga e gjithë bota janë prekur nga koronavirusi, ndërsa mbi 253 mijë persona kanë humbur jetën.
