Një reagim i menjëhershëm ka ardhur nga ana e kryeministrit Rama, pas vendimit të presidentit Meta për kthimin sërish në Kuvend të ligjit për rezervat shtetërore të arit, argjendit dhe metaleve të tjera të çmuara.
Rama ka zgjedhur t’i përgjigjet Metës, me një shprehje të ish-presidentit amerikan Richard Nixon. “Njeriu i mendimit që nuk vepron është inefektiv; njeriu i veprimit që nuk mendon është i rrezikshëm.
Richard Nixon”, shkruan Rama.
Pak ditë më parë, ligji për rezervat materiale të shtetit u ndryshua, duke bërë që lëvrimi i këtyre rezervave të bëhet ‘ekskluzivitet’ i kryeministrit, ndryshe nga sa ka qenë deri më tani, ku vendimi merrej në mbledhjen e Këshillit të Ministrave.
Qeveria argumentoi se ky ndryshim u bë për të kursyer vonesat, por Meta mendon se ky shpjegim është i pamjaftueshëm, ndaj ka vendosur ta kthejë në Kuvend.
