Ish-drejtuesi i Antiterrorit, Gledis Nano, bëri sot betimin në një ceremoni zyrtare ku të pranishëm ishin Ministri i Brendshëm, Bledi Çuçi dhe ish-drejtori i policisë, Ardi Veliu. Z. Nano ka marrë zyrtarisht detyrën e kreut të Policisë së Shtetit.
“Në nderin tim personal, betohem për të mbajtur me nder flamurin e Policisë së Shtetit”. Në fjalën e tij të parë publike, Nano premtoi se do çojë përpara reformat në Policinë e Shtetit, ndërsa kërkoi edhe bashkëpunimin e qytetarëve.
“Do jem në lartësinë e detyrës, në shërbim të qytetarëve. Gjej rastin të falenderoj Ministrin e Brendshëm dhe kryeministrin. U futa në polici nga pasioni, i frymëzuar nga babai im, ish-zyrtari i Policisë së Shtetit.
Sfidat për policinë janë të shumëfishta. Qytetarët presin nga policia reagim tjetër në sjelljen e saj. Do çojmë përpara reformat. Kërkojmë që qytetarët ta konsiderojnë organizatën tonë si partner.
Prioriteti im do jetë intensifikimi i bashkëpunimit me të gjitha agjencitë ligjzbatuese dhe institucionet e huaja.
Unë ju garantoj se me angazhimin tim maksimal, do vazhdoj të çoj përpara në reformat e policisë.
Dua t’i uroj çdo kolegu suksese. Kërkoj angazhimin tuaj maksimal në realizimin e detyrave, sipas betimit që kemi bërë”, tha drejtori i përgjithshëm i Policisë së Shtetit.
