Alban Skënderaj ka publikuar këngën “Plagë në gjysmëshpirt”, një këngë për dhimbjen e bashkëshortes së tij, Miriam Cani.
Kënga është shkruar pikërisht 10 vite më parë, kur Miriami humbi të ëmën, ndërsa këngëtari rrëfehet se dhimbje kaq të thella nuk ka nevojë të ndahen me publikun por duhen mbajtur për vete. Kjo duket të jetë edhe arsyeja përse kënga nuk është publikuar deri më sot, ndërsa dy vite më parë Albani ka humbur nënën e tij, ndjesi të cilën e gjen të pasqyruar në këto vargje.
“Na mungojnë çdo ditë dhe sado koha të kalojë, këto plagë nuk do mbyllen kurrë plotësisht. Ne nuk jemi aspak të veçantë, nuk kemi imunitet nga dhimbja, jemi njerëz si të gjithë dhe sipas nesh, misioni më i madh i një artisti është të shkruajë këngë që sado pak i bëjnë njerëzit të mos ndihen vetëm, si në gëzimin, ashtu edhe në dhimbjen e tyre. Ndaj vendosëm këtë këngë dhe këto ndjenja t’i ndajmë me ju”, përfundon rrëfimin këngëtari, duke treguar arsyen përse vendosën publikimin e kësaj këngë.
