Aktualitet

“Në mëshirë të fatit”, PD-ja ngre 5 pyetje për qeverinë


               Publikuar në : 10:33 - 05/12/19 M P

Kanë vijuar edhe sot akuza nga kampi opozitar për mënyrën sesi qeveria po menaxhon situatën pas tërmetit të ditës së martës, që la pas 51 viktima dhe mbi 900 të plagosur.

Në një dalje për mediat, Sekretari i Përgjithshëm i PD-së, Gazment Bardhi ka akuzuar qeverinë se nuk ka marrë asnjë masë për tërmetin e parë që goditi vendin në 21 Shtator. Sipas tij, të gjitha ata që u prekën nga ky tërmet ngelën në mëshirë të fatit.

Në fjalën e tij, Bardhi i ka drejtuar 5 pyetje qeverisë në lidhje me pallatet e shembura në Thumanë. Gjithashtu, ai ka kërkuar që Prokuroria të bëjë lëvizjet e saj dhe të gjejë fajtorët.

‘Vendet Islamike’, të dielën konferenca e parë e donatorëve për Shqipërinë

“Pallatet në Thumanë, ku humbën jetën 24 qytetarë, u dëmtuan rëndë që në 21 Shtator. Banorët tregojnë se për gati 1 muaj kanë jetuar në çadra, për shkak se banesat e tyre dukeshin të pasigurta.

Është fakt se Qeveria nuk mori asnjë masë konkrete pas tërmetit të 21 Shtatorit për t’u ardhur në ndihmë njerëzve me banesa të dëmtuara, ku 24 banorë humbën jetën më 26 Nëntor.

Sot, është dita të zbardhen dhe te sqarohen një herë e mirë para gjithë shqiptarëve këto 5 pikepyetje:

  1. A u verifikuan pallatet në Thumanë pas tërmetit të 21 Shtatorit?
  2. Kush janë ekspertët që u angazhuan dhe çfarë vlerësimi bënë ata?
  3. A u lajmëruan banorët për gjetjet e ekspertimit?
  4. Nëse godinat ishin vlerësuar si të rrezikshme, çfarë masash u morën për strehimin e banorëve?
  5. Kush lejoi futjen e banorëve në pallatet e shembura në 26 Nëntor?

Qeveria ka detyrimin të sqarojë pa vonesë opinionin publik, ndërsa prokuroria ka përgjegjësinë ligjore të hetojë për të nxjerrë përgjegjësit për humbjen e jetëve të 24 qytetarëve në dy pallatet e dëmtuara në Thumanë”, deklaron Bardhi.

Kthehu
WhatsApp Denonco ne TT