Kryetari i PD-së, Lulzim Basha ka vizituar ditën e sotme banorët e prekur nga tërmeti në Rrëzë të Krujës.
Përmes një postimi në Facebook, Basha tregon se në këtë zonë nuk është ofruar asnjë ndihmë për banorët e prekur. Ai shton se shtëpitë e tyre janë të rrënuara dhe nuk iu është dhënë asnjë çadër. Basha theksoi se gjendja e tyre po rëndohet nga moti i ftohtë.
Postimi i plotë:
Dhjetëra familje me fëmijë të vegjël në Rrëzë të Krujës, kanë mbetur krejt të vetëm në përballimin e pasojave që u la tërmeti i javës së kaluar.
Për fat të mirë në këtë fshat nuk pati asnjë viktimë, por pothuajse të gjitha shtëpitë janë të pabanueshme. Asnjë masë nuk është marrë për ta. Asnjë ndihmë, asnjë çadër apo ushqim, nuk u ka ardhur nga shteti.
Duhet hapa konkretë dhe zgjidhje emergjente sepse gjendja e tyre po rëndohet edhe nga moti i ftohtë.
Pa humbur kohë 150 milion dollarët që janë ndarë për 10 oligarkë duhet të kalojnë për banorët e dëmtuar nga tërmeti që sot janë në qiell të hapur.
Qeveria duhet të nisë lëvrimin e fondeve për tu ardhur në ndihmë banorëve në zonat rurale për të cilët është e pamundur zhvendosja, në mënyrë që të nisin riparimin apo rindërtimin e shtëpive të shkatërruara.
Denonco ne TT