Kryedemokrati Basha, gjatë mesditës së sotme zhvilloi një bashkëbisedim me disa qytetarë të cilët kanë kaluar Covid-19. Qytetarët rrëfyen situatat e tyre në përballjen me virusin. Ata i thanë kryetarit të PD se në shumicën e rasteve, në mungesë të përgjigjes nga shteti, janë detyruar të gjejnë zgjidhje në spitalet private duke paguar shuma të papërballueshme nga familjet shqiptare.
Një nga të pranishmet u shpreh se kishte dy prindërit e saj me virus, e se tarifa në fund i ka shkuar në 2 milionë lekë të vjetra. “Në shtet, në shtet analizat dhe skanerin brenda ditës. Fatura në fund të ditës ishte 500 mijë lekë të vjetra, pa mjekim, vetëm ekzaminime për të konfirmuar që jemi dhe ku jemi me gjendjen.
2 skanerat dhe analizat e gjakut, kaq. 500 mijë lek, po. Të nesërmen filloj mjekimin babi. Mori mjekim për të paktën 10 ditë edhe babi edhe mami, të nesërmen pjesëtarët e tjerë të familjes bëmë tampon privatisht.
4 tamponë, fatura për secilën ishte 100 euro. Domethënë 400 euro tampon, për të parë mënyrën se si do izoloheshim, se pjesëtarët e tjerë domethënë familjarët janë moshë më e madhe, me probleme.
Prej 10 ditësh u mjekuan të dy. Në këto 10 ditë infermieri vinte në shtëpi privatisht, mjekimin ua mora të dyve normalisht privatisht dhe në fund të ditës së dhjetë, fatura minimale vetëm për një mjekim normal, nuk po them as aparat oksigjeni, vetëm analiza rikontrolli dhe fatura e mjekimit, ka qenë 2 milion lekë të vjetra.
Domethënë me gjëra të domosdoshme, holluesi i gjakut, antibiotiku, infermieri, domethënë gjithë mjekimi bazë. Koha është sukses dhe koha apo ekzaminimi apo tamponi në kohë këtu padiskutim që mungon, padiskutim”, u shpreh qytetarja.
