Publikohen emrat e futbollistëve që do të zbresin mbrëmjen e 10 janarit në stadiumin e ri “Air Albania” për ndeshjen e bamirësisë.
Të ardhurat nga shitja e biletave për këto ndeshje do të shkojnë në ndihmë të të prekurve nga tërmeti i 26 nëntorit. Lista përbëhet nga disa prej yjeve të kombëtares shqiptare në vite si dhe kampionë të njohur të futbollit italian, turk dhe grek.
Cana, Murati, Strakosha, Bogdani, Duro, Raklli, Hasi, Beqaj dhe Tare do të jenë disa nga emrat më të njohur që do të përfaqësojnë Shqipërinë.
Nga Italia do të luajnë në këtë sfidë, ish-futbollistë të njohur si Zambrotta, Tomassi apo Di Biagio.
Ndërsa Greqia do të përfaqësohet me disa prej kampionëve të Evropës të vitit 2004 si Charalampos dhe Gekas.
Nuk mungojnë dhe yjet e futbollit turk si Altintop apo Rustu.
