Policia ka ndaluar mbrëmjen e sotme në Vlorë një traget me mbetje të rrezikshme që vinte nga Italia.
Bëhet me dije se 6 persona janë arrestuar, ndërsa policia ka sekuestruar tragetin, një fugon mallrash dhe një sasi të madhe e dyshuar me mbetje amianti.
Gjatë kontrollit të ushtruar në tragetin e linjës Brindisi – Vlorë, në pjesën fundore të garazhit, u gjet një sasi e papërcaktuar mbetjesh të ndaluara e të dyshuara të rrezikshme, të cilat kishin destinacion përfundimtar Shqipërinë.
Njoftimi i plotë:
Finalizohet operacioni policor “Amiant”
Operacioni nga Departamenti i Policisë Kriminale, Drejtoria Vendore e Policisë Vlorë, Drejtoria për Kufirin e Migracionin Vlorë në bashkëpunim me Prokurorinë e Vlorës dhe Ministrinë e Mjedisit.
Parandalohet dhe goditet një tentativë për futjen e një sasie të konsiderueshme mbetjesh të rrezikshme e të dëmshme për mjedisin dhe shëndetin e njeriut.
Mbetjet vinin me traget nga Italia në drejtim të portit të Vlorës me destinacion përfundimtar Shqipërinë
Vihen në pranga 6 persona përgjegjës.
Sekuestrohet në cilësinë e provës materiale trageti, një fugon mallrash dhe një sasi e madhe e dyshuar me mbetje amianti.
Në bazë të informacioneve të mara në rrugë operative nga strukturat e Departamentit të Policisë Kriminale, se me një traget që ishte nisur nga Italia po transportohej një sasi e konsiderueshme me mbetje të rrezikshme për shëndetin e njeriut dhe ambientin, me qëllim për t’i depozituar në Shqipëri, u organizua puna dhe në bashkëpunim me Policinë vendore të Vlorës dhe atë Kufitare, u finalizua operacioni policor i koduar “Amiant”, në kuadër të të cilit u bë arrestimi në flagrancë i shtetasve:
- Xh., 65 vjeç, banues në Vlorë
- Ç., 28 vjeç, banues në Vlorë
- G., 48 vjeç, banues në Vlorë
- T., 71 vjeç, banues në Vlorë
- Ç., 55 vjeçe, banuese në Vlorë
- K., 45 vjeç, banues në Vlorë
Gjatë kontrollit të ushtruar në tragetin e linjës Brindisi – Vlorë dhe konkretisht në pjesën fundore të garazhit, është gjetur dhe sekuestruar me cilesinë e provës materiale një sasi e papërcaktuar mbetjesh të ndaluara e të dyshuara të rrezikshme, për të hyrë në Republikën e Shqipërisë.
Nga ana e Policisë u kryen veprimet procedurale ku në cilësinë e provës materiale, u sekuestrua trageti si dhe sasia e mbetjeve, të cilat nuk u lejuan të dilnin nga ambienti i tragetit.
Materialet procedurale u referuan në Prokurorinë pranë Gjykatës së Shkallës Parë Vlorë, për veprën penale “Kontrabanda me mallra të ndaluara”, “Menaxhimi i mbetjeve” dhe “Transportimi i mbetjeve”
