Prokuroria e Tiranës ka sekuestruar të gjitha bisedat e raportuara në sallën operative nga efektivët e policisë, të cilët pretenduan se për 25-vjeçarin Klodian Rasha kishin njoftuar në radio, duke kërkuar edhe ndihmë e përforcime.
Të gjitha bisedat janë marrë nga sistemi TIMS, aty ku edhe regjistrohen dhe po zbardhen nga hetuesit e dosjes. Pas kqyrjes së provave, mbetet për t’u parë nëse versioni i efektivit është i vërtetë dhe nëse ata vërtetë kanë kërkuar përforcime në drejtim të rrugës “Dritan Hoxha”, aty ku dhe u bë ndjekja e Klodian Rashës.
Tirana ishte në kaos mbrëmjen e djeshme, për shkak të protestave masive. Dorëheqja e Sandër Lleshajt nga posti i Ministrit të Brendshëm, nuk qetësoi aspak me qindra qytetarë që kishin dalë në protestë. Ishte kryeministri, ai i cili në një dalje të posaçme për mediat, dy ditë pas vrasjes së të riut Klodian Rasha nga efektivi i policisë “Shqiponja”, zbuloi se ministri Lleshaj ka dhënë dorëheqjen nga detyra.
I pari i qeverisë shqiptare u shpreh se Lleshaj i kishte komunikuar dorëheqjen, pak pasi kishte ndodhur krimi, por sikundër u shpreh, kërkoi që diçka të tillë ta dëgjonte ballë për ballë nga vetë ai, sapo të kthehej nga SHBA.
