Moshat e treta janë më me risk nga koronavirusi vdekjeprurës, e ndërsa fëmijët preken pak. Këtë e konfirmoi shefja e Infektivit në QSUT, Najada Como në studion e emisionit “Real Story” në “News 24”. Como shtoi se Shqipëria ka marrë masa shtesë, menjëherë pasi koronavirusi u përhap me shpejtësi në Itali.
“Më të cënuar janë moshat e treta, sepse ata kanë më tepër rrezik të preken nga sëmundje të ndryshme. Fëmijët për fat të mirë pak preken, dhe ky është një lajm i mirë. Nuk ka asnjë fëmijë viktimë. Duke qenë se Italia është një vend afër nesh, ne kemi marrë masa shtesë”, tha Como.
Larja e shpeshtë e duarve, mbulimi i gojës kur tështini, shmangia e prekjes me dorë të hundës, gojës dhe syve janë disa nga këshillat që Ministria e Shëndetësisë ka shpërndarë për qytetarët. Gjithashtu këshillohet që sipërfaqet të pastrohen me dezinfektantë me bazë klori ose alkooli.
Cilat janë simptomat e një personi të infektuar me koronavirus?
“Simptomat varen nga virusi, por shenjat e zakonshme përfshijnë simptomat e aparatit të frymëmarrjes: ethe, kollë, marrje fryme dhe vështirësi në frymëmarrje. Në raste më të rënda infeksioni mund të shkaktojë pneumoni, sindromë të rëndë respiratore akute, insuficencë të veshkave, madje edhe vdekje”.
