Kryeministri i Greqisë, Kiriakos Mitsotakis, është shprehur se vendi i tij është në favor të integrimit të Ballkanit në BE.
Në një takim në Selanik, Mitsotakis tha se kjo gjë jo vetëm që do të transformonte një faktor stabiliteti në rajon, por edhe do të ishte një levë demokratike e domosdoshme për të modernizuar fqinjët tanë dhe zgjidhjen e çështjeve bilaterale.
“Ashtu si me të gjithë, edhe me Shqipërinë dëshirojmë marrëdhënie të fqinjësisë së mirë. Por, kusht për progres të përbashkët, për të çelur një moment rrugën evropiane për Shqipërinë, është respektimi i minoritetit grek dhe të drejtave të tyre”, u shpreh Mitsotakis
Ai përsëriti qëndrimin e partisë së tij kundër marrëveshjes së Prespës, por u shpreh se do e respektoj atë, pasi nuk do që vendi të futet sërish në krizë.
“Ende besoj se marrëveshja e Prespës është negative për vendin tonë por nuk do të ekspozoj vendin drejt aventurave. Pa rrezikuar destabilizimin më të vogël, ne do të monitorojmë nga afër detyrimet e fqinjëve tanë, pajtueshmërinë e fqinjëve tanë me detyrimet e tyre. Kjo është ajo që dikton sot realizmi patriotik i vërtetë”, shtoi kryeministri i Greqisë.
