Pas një periudhe të gjatë heshtje, një ditë më parë kreu i shtetit, Ilir Meta, u prononcua për mediat duke u rreshtuar krah aleatit të tij të vjetër, ndërsa sulmoi ashpër ambasadoren amerikane Yuri Kim. Meta e cilësoi Berishën si vera, duke e bërë të qartë se është krah tij në këtë betejë të ashpër. “Nuk dëshiroj të merrem me çështje të tilla, sepse nuk është kjo detyra ime, sigurisht që nuk mund të rri të them, doktori është si vera, sa më i vjetër aq dhe më tërheqës e demokrat bëhet”, deklaroi ai.
Në deklaratën e tij të mbajtur nga Korça, Meta sulmoi ambasadoren Kim. Ai tha se Berishën e ka votuar populli, dhe duhet të respektohet ky vullnet. “Së pari, sovraniteti është respektim i vullnetit të qytetarëve. S’ka mbrojtës më të mirë të sovranitetit kombëtar se sa vetë sovrani, vetë qytetari, sigurisht kur ai është i ndërgjegjshëm për votën e tij. Kur e mbron, nuk e shet, nuk e tregton.
Sa i takon sovranitetit, padiskutim që fjala kyç për dekadat që vjen është sovranitet. Që nuk do të thotë mospërmbushje të detyrave të Shqipërisë ndaj NATO-s ku jemi anëtar prej kohësh apo BE, ku dëshirojmë të anëtarësohemi.
Me gjithë detyrimet tona në raport me institucione e organizata, i kemi të fiksuar qartë në Kushtetutën e Republikës së Shqipërisë. Besoj se në radhë të parë është e rëndësishme ti kthejmë sovranitetin qytetarëve.
Ata mos injorohen e përjashtohen më, mos vendosen para faktit të kryer, mos jenë më viktimë e arbitraritetit e kulisave që kanë kërkuar e kërkojnë ta nxjerrin këtë sistem jashtë. Është bërë një hap me 25 prillin, por hapa të tjerë do të ndodhin në të ardhmen”, tha Meta.
