Presidenti Ilir Meta përgjatë një interviste të zhvilluar me drejtorin e Informacionit të “News24”, Robert Rakipllarin, ka folur për situatën e krijuar nga koronavirusi në vend.
Meta theksoi se mbështetja fillimisht duhet të shkojë tek ata që janë infektuar nga COVID-19 në Shqipëri.
Kreu i Shtetit pohoi se çdo orë dhe çdo ditë duhet të forcohet mekanizmi parandalues: “Është një situatë e re, me të cilët duhet të mësohemi dhe të nxjerrim eksperienca të reja për ta përballuar me kosto minimale në radhë të parë pa kosto për shëndetin për qytetarët.
Do të jetë një betejë e gjatë, e cila pritet të zgjasë në një kohë të pacaktuar. Mbështetja fillimisht duhet të shkojë për ata që janë prekur nga ky virus, që të kalojnë këtë moment pa rrezikuar jetën e tyre, por edhe për familjarët dhe personelin që është në shërbimin e tyre.
Pa dyshim impakti do të jetë i përgjithshëm. Jemi në një moment vetëmbrojtje ku kujdesi do të jetë maksimal. Çdo orë, çdo ditë duhet të forcojmë mekanizmin parandalues.
Në vazhdimësi kam qenë në komunikim me të gjitha institucionet dhe marrjen e kompetencave të secilit prej tyre në përballimin dhe parandalimin e këtij fenomeni. Është prioritare që kjo situatë të normalizohet sa më shpejt që të jetë e mundur. Pa dyshim që impakti tashmë ka filluar të mos jetë pozitv dhe kjo natyrisht është edhe për vendet e tjera.
Çdo vend mobilizon resurset e tij për të mbrojtur veten dhe nuk është si në rastin e fatkeqësisë së tërmetit, ku gjithkush përpiqet të ndihmojë”.
Në vijim Meta u shpreh se eksperiencat e Italisë “duhet të na shërbejnë edhe ne për të adoptuar masa të reja edhe parandaluese dhe përmirësuese”.
