Nga Anxhela Ferra
Në mbledhjen e parë të Këshillit Koordinues të Diasporës, kryeministri Edi Rama u shpreh se në janar pritet të ketë një faturë paraprake e dëmeve të tërmetit. Teksa qeveria është ende në fazën e inspektimit, ato kanë bërë me dije se kanë gati projektin e rindërtimit. Dhe se sipas tyre fondet që kanë do të realizojnë edhe fazën e vështirë që ka të bëjë me ringritjen e ndërtesave.
Deri më tani, pjesa më e madhe e njerëzve që u prekën nga tërmeti, janë të strehuar nëpër hotele. Disa kanë shkuar te familjarët e tyre, e ndërsa të tjerë vazhdojnë të jenë nëpër çadra. Por, si është duke e bërë menaxhimin e të ardhurave qeveria?
Pjesa më e madhe e qytetarëve të pyetur nga Tirana Today, shprehen mosbesues. Sipas tyre, qeveria nuk është duke bërë një menaxhim të mirë, duke thënë se abuzime do të ketë.
“Akoma shpejt është për ta kuptuar këtë gjë. Ende është për tu parë. Por, unë mendoj se ka vend për abuzime. Përderisa kjo ka ndodhur edhe në Itali, pse mos të ndodhë edhe këtu?!”
“Unë nuk e shoh që po menaxhohen shumë mirë, disa abuzojnë. Dhe unë e shoh si një neglizhencë të madhe të qeverisë.”
“Nuk kam besim fare se nuk do të ketë abuzime nga qeveria sa i takon fondeve për tërmetin. Ata do të gjejnë një mënyrë që ta shfrytëzojnë për vete.”
“Haram iu qoftë po i shfrytëzuan për veten e vetë. Ato para ata duhet t’i shpenzojnë për popullin. Se ky i fundit, po rri nëpër çadra dhe streha, Është gjynah i madh.”
“Pyetje shumë e vështirë kjo. Sigurisht që kam besim që diçka do të bëhet për ta, sepse tërmeti ishte shumë i rëndë. Dhe të gjithë duhet të përfshihen, që nga i madhi te i vogli. Por, jo të bëjnë vepra korruptive. Nëse ndodhin këto, atëherë i bie që ata s’kanë zemër fare.”
Përkundër atyre që nuk kanë besim te qeveria, janë disa të tjerë që thonë për Tirana Today se ajo është duke bërë një punë të mirë. Dhe se kanë besim se nuk do të ketë abuzime prej tyre.
“Unë mendoj se deri tani menaxhimi po bëhet mirë. Pavarësisht se hidhen fjalë, me sytë tanë duket që po bëhet mirë. Se brenda kemi dhe grupet e shoqërisë civile, duke i ulur shanset për të bërë abuzime.”
“Abuzimet mund të jenë, por do të jenë minimale. Sepse qeveria nuk fal në këto lloj rastesh, pasi ka të bëjë me fatkeqësi. Edhe brenda në qeveri mund të ketë abuzime nga individë të veçantë, por në përgjithësi nuk e besoj.”
“Me çfarë shohim ne, duket se janë në vijë të drejtë. Por, duhet të jesh brenda që të flasësh me prova.”/ TIRANA TODAY
