Ish-ministri i Drejtësisë, Ylli Manjani, e ka bërë publike faktin se mbështet “Foltoren” e ish-kryeministrit Sali Berisha. Sipas tij, kjo është nisma e vetme demokratike në vend. Në komentin e tij ai sqaron se për shkaqe të ndryshme, Berisha mund të mos jetë më i pëlqyeri, por sipas tij, nuk mund ti mohohet fakti se po drejton një lëvizje për demokraci.
Manjani nënvizon faktin se ish-kryeministri Berisha, po bën atë punë që nuk arriti ta bëjë kryedemokrati Basha, që është të paktën 30 vite më i ri në moshë. Ndonëse “Foltorja” është lëvizje e brendshme në PD, Manjani i mëshon fort faktit se është me Berishën dhe me lëvizjen e drejtuar prej tij.
Statusi
Padyshim nuk duhet promovuar ky dimension, por nuk mund të rrimë pa lexuar faktin se jugu i Shqipërisë po e pret më me entusiazëm foltoren e Doktorit.
Kjo është një shenjë e mirë dhe sa më takon më pëlqen pa masë.
Shqipëria është shumë e vogël si dhe, ne shqiptarët jemi shumë pak për t’u ndarë në veri dhe jug. Për fat të keq prej shumë vitesh ky dallim i theksua disi..
Ndoshta kjo nismë e Doktorit “Tropojan” mund të ndihmojë disi për ta shuar këtë ndasi absurde.
Nga ana tjetër është gjithashtu e vërtetë që ne “veriorët” nuk e demonstrojmë shumë entusiazmin… Nuk na pëlqen hiç të duartrokasim…
Nejse, foltorja është sot për sot nisma e vetme politike për demokraci.
Ky është gjithashtu fakt!
Për shkaqe të ndryshme dhe për disa persona Berisha mund të mos jetë më i pëlqyeri, por që po drejton një lëvizje për demokraci nuk mund ti mohohet.
Minimalisht po bën atë punë që nuk arriti e nuk arriti ta bëjë Luli që është të paktën 30 vite më i ri në moshë.
Pavarësisht se Foltorja është lëvizje e brendshme në PD, unë jam me të.
Gjirokastra ishte qyteti i radhës që priti “Foltoren” e Sali Berishës, i cili ripërsëriti të gjitha akuzat, që sipas tij, duhet të mblidhet Kuvendi i PD dhe të shkarkohet Lulzim Basha. Ish-kryeministri Berisha e mbushi “Foltoren” e tij me ish-ministra dhe ish-drejtorë të kohës që ishte në pushtet 2005-2013, ndërsa të pranishëm ishin edhe kryetarët e degës së PD.
Berisha vijoi me sulmet ndaj Bashës në Gjirokastër, ku tha se ai është një njeri që ka frikë nga vota, dhe se do të mbahet mend si një njeri me votofobi të madhe.
