Nga Anxhela Ferra
Studentët i janë rikthyer protestave. Ashtu siç ishte paralajmëruar më parë një grup prej tyre janë mbledhur sot para ambienteve të Ministrisë së Arsimit. Protesta ka nisur në orën 12:00 dhe ka zgjatur për një orë. Ata janë mbledhur me pretendimin se kërkesat e tyre nuk janë plotësuar. Ndonëse kryeministri Rama pak para fillimit të protestës publikoi një video, ku thuhej nëpërmjet shifrave se premtimi ishte mbajtur.
Studentët shprehen për Tirana Today se kërkesat e tyre janë përdorur nga qeveria për show dhe se përsëri arsimi ndodhet në të njëjtat kushte.
“Në fillim ndodhi një propagandë që u shty dhe pagesa për Bachelor dhe Master. Dhe më pas sa për të krijuar një vakantë, sa për të shuar zërin studentor. Por, kur studentët shkuan në banka paguan ato fatura po aq të kripura, njëjtë si në vitin paraardhës.
Aty u pa vërtetë propaganda qeverisëse. Gjatë këtyre muajve na u tha që disa pika kërkojnë afat, siç ishte karta e studentit apo laboratorët. Por, edhe pse po mbaron ky vit ne jemi po njësoj. Nuk është bërë asgjë as për të e as për kërkesat e tjera.”
Në protestë veç një grupi studentësh, ndodheshin edhe pedagogë të cilët i bëjnë thirrje qeverisë për përmirësim të kushteve.
“Vendosëm të rikthemi sepse dihet që Pakti për Universitetin ishte thjeshtë një fasadë. Por, kërkesa jonë kryesore është ndërrimi i sistemit. Sepse me këtë klasë politike nuk mund të ketë një arsim cilësor e as një Shqipëri më të mirë. Kërkesa jonë kryesore dhe urgjente është ‘Rama ik, Basha ik, Meta ik’.”
“Unë jam pedagoge dhe si e tillë që kryeministri mund të nxjerrë shifra, foto, fasada e çfarë të dojë ai. Ne kemi dalë këtu sepse jemi i vetmi vend, të fundit në Ballkan dhe Evropë që kemi mungesë financimi në arsim. Jemi të fundit në Ballkan për pagat e pedagogëve dhe asnjë fokus për arsimin.”
Ndryshe nga protestat e nisura në Dhjetor të cilat kanë qenë të qeta, protesta e sotme ishte e tensionuar. Studentët përdorën tymuese, si edhe kanë thyer me gurë një nga xhamat e Ministrisë së Arsimit.
“Është një revoltë normale, studentët realisht kanë qenë të revoltuar nga gjithçka që ndodhi. Ngaqë u premtuan shumë dhe u bë zero. Dhe ndaj u thyen xhamat e u përdorën tymueset. Vazhdimi i protestave të tjera do të shihet nga reagimi i studentëve të tjerë dhe popullit sa na mbështet.”
“Unë mendoj se çdo protestë i bën mirë vendit. Por, u habita kur pashë të hidheshin tymuese dhe goditeshin xhamat. Mendoj që një veprim i tillë nuk është një ftesë për studentët. Por i largon ata duke i përafruar me opozitën, e mendojnë se është partiake e politike. Ndaj mendoj se ishte diçka e gabuar.”
Studentët thonë për Tirana Today se ende nuk kanë vendosur për vazhdimësinë e protestave, pasi pritet të kenë diskutime të tjera me njëri-tjetrin. Ditën e sotme ata paraqitën një listë me pesë kërkesa, ku kërkonin rrëzimi i ligjit të Arsimit të Lartë.
Arsim cilësor për gjithë të rinjtë duke mundësuar mbështetjen financiare në të dyja ciklet e studimit. Rankim i programeve sipas modeleve më të mira bashkëkohore. Rritja e peshës së përfaqësimit në Institucionet e Arsimit të Lartë. Dhe autonomi reale e IAL dhe jo e diktuar nga bordet qeveritare./ TIRANA TODAY
