Ministri i Diasporës Pandeli Majko, ish-kryeministër gjatë kohës kur vendi ynë priti shqiptarët e Kosovës, në fjalën e mbajtur ditën e sotme në Prishtinë, në Akademinë Solemne “Faleminderit Shqipëri”, ka apeluar për të ecur bashkë në një rrugëtim që tashmë ka nisur.
Majko gjatë fjalës së tij theksoi se në ato kohë shumë të vështira, ata kanë bërë vetëm detyrën dhe vëllai mund edhe të mos falenderohet.
“Me Sali Berishën ishim gati të vriteshim në ‘97, por pas masakrës së Reçakut, u mblodhëm, i thirrën të gjithë partitë e opozitës dhe fjalia që thamë ishte: Kur serbët na vrasin ne duhet të bashkohemi”, deklaroi ndër të tjera Majko.
Pjesë nga fjalimi i tij: “Ne që kemi qenë në drejtim të institucioneve në atë periudhë të vështirë thjesht kemi bërë detyrën tonë ka pasur ca të tjerë që këtu në Kosovë, pa pasur një lloj detyre, zyrë apo institucion luftuan për lirinë e kombit shqiptar sepse në thelb liria e Kosovës ishte liria e Shqipërisë, në këtë kontekst ajo çfarë ndodhi në 1999 ishte ajo që rëndom ndodh për cilindonjeri. Çdo kush përkufizohet nga ditët e vështira.
Nuk besoj se na përkufizojnë ditë të mira. Kemi bërë vetëm detyrën tonë.
Ndaj ndihemi mirë, por dhe keq kur na falenderoni, sepse në jemi vëllai dhe vëllai edhe falenderohet, por dhe jo. Tani a të mërzit ndonjëherë vllai, edhe të mërzit… por si i thoni në Kosovë kur ta sjell vëllai shpirtin në majë të hundës, ah vëllai si shkjau. Por ne për këtë arsye duhet ta durojmë njëri-tjetrin.
Të kujtojmë ato ditë të vështira, kur përkufizuam e përcaktuam se kush jemi nga vijmë e mbi të gjitha ku do të shkojmë.
Së bashku me Ilirin, edhe shumë të tjerë, mes të cilëve edhe ai që është sot kryeministër i vendit Rama, mblidheshim a ishim aq të bindur, edhe të fortë, ju siguroj që ishim të shqetësuar, të frikësuar se do na kujtohej emri brez pas brezi për të keq, por nuk mund të lë pa thënë atë që tha Presidenti Meta, u mblodhëm të majtë e të djathtë, komunistë balliste, legalistë.
Me Sali Berishën ishim gati të vriteshim në ‘97, por pas masakrës së Reçakut, u mblodhëm, i thirrën të gjithë partitë e opozitës dhe fjalia që thamë ishte: Kur serbët na vrasin ne duhet të bashkohemi.
Tanimë në një kohë tjetër, ne në këto kushte të vetëpërkufizimit tonë, nga momenti i vështirë duhet të shikojmë pak më larg.
Unë nuk jam nga ata që fal kollaj, por ja që kam filluar ta bëj. Por duhet ta bëj se duhet të ndryshojmë. Në ‘99 e kuptuam se nuk bënim dot pa njëri-tjetrin, e duhet të jemi gjithmonë bashkë”.
