Të gjithë çerdhet dhe kopshtet në kryeqytet do të qëndrojnë të mbyllura përkohësisht. Kjo masë është ndërmarrë për parandalimin e prekjes nga koronavirusi. Bashkia e Tiranës njofton se po vijon dezinfektimet në këto institucione parashkollore, që të jenë gati për rihapjen e tyre.
“Vendimi për shkollat vlen edhe për kopshtet e çerdhet! Dhe pse fëmijët nuk paraqesin rrezikshmëri, mund të jenë bartës që prekin më pas gjyshërit e tyre, që janë me të rrezikuar. Ndërkohë po vijojmë dezinfektimet që të jemi gati kurdo që vendoset rihapja”, shkruan Veliaj në një postim në Facebook.
Ministrja e Shëndetësisë, Ogerta Manastirliu tha se janë 14 persona që kanë pasur kontakte me 2 të infektuarit me koronavirus në Shqipëri, dhe aktualisht janë izoluar.
Në një konferencë për shtyp, ministrja u shpreh se kanë testuar 65 raste dhe 2 prej tyre rezultuan pozitivë. Aktualisht po priten analizat e 14 personave, pasi kanë pasur kontakte me 2 të infektuarit. Ministrja theksoi se janë marrë masat, dhe janë gati planet e veprimit.
