Kryeministri Rama, sikundër ministrja Manastirliu, vijojnë të përcjellin mesazhe të forta për shëndetin e njerëzve, duke apeluar që maska të mbahet në ambiente të mbyllura ku dhe njerëzit nuk kanë distancë nga njëri-tjetri.
Kreu i qeverisë e ka nisur ditën me një lutje për të gjithë qytetarët shqiptarë, që të vendosin maskën, për shkak të rritjes së të infektuarve me koronavirus, si dhe numrit të lartë të viktimave.
Teksa publikon disa foto të mjekëve të lodhur nga puna intensive në spitalet Covid, kryeministri iu kujton qytetarëve se duhet të mbrojnë veten, por edhe ata.
“MIRËMËNGJES
dhe duke ju kujtuar të mbroni veten, njerëzit e dashur si dhe t’i japim një dorë mjekëve dhe infermierëve duke zbatuar këtë masë të thjeshtë në çdo mjedis të mbyllur, ju uroj ditë të mbarë”, shkruan ai në Facebook.
Aktualisht në dy spitalet COVID, në spitalin Infektiv dhe spitalin “Shefqet Ndroqi” po trajtohen 123 pacientë, 18 në terapi intensive dhe 3 pacientë janë të intubuar. Gjatë 24 orëve të fundit janë kryer 267 testime për të dyshuar të prekur me COVID-19, nga të cilat janë konfirmuar 81 raste pozitive.
