Ministrja e Arsimit, Evis Kushi, ka shprehur mbështetjen ndaj maturantëve që protestojnë për testin e matematikës, ku ka ka sqaruar se nëse rezulton që niveli i vështirësisë është më i lartë se sa është parashikuar, do të rishikohet shpërndarja e pikëve. Ministrja sqaron me anë të një postimi në Facebook, se kërkesat e maturantëve protestues janë duke u rishqyrtuar. Në këto çaste janë duke vlerësuar me grupet e ekspertëve nivelin e vështirësisë së çdo pyetjeje në testin e matematikës.
Postimi i plotë:
Të dashur maturantë,
Siç ju kemi premtuar, ne do të jemi gjithmonë në mbështetjen tuaj. Në këto momente, jemi duke vlerësuar edhe një herë me grupet e ekspertëve nivelin e vështirësisë së çdo pyetjeje në testin e matematikës. Dhe në rast se na rezulton që ai e tejkalon nivelin e parashikuar, të cilin e kushtëzon mënyra e zhvillimit të mësimit gjatë këtij viti shkollor, pa dyshim që ne do ta rishikojmë shpërndarjen e pikëve në test dhe mënyrën e vlerësimit.
Ju uroj shumë suksese për provimin e radhës!
Maturantët po protestojnë për provimin e djeshëm të matematikës. Ata ndihen të zhgënjyer pasi teza ishte tepër e vështirë, dhe jashtë programit që ata kanë zhvilluar.
