Kryeministri Edi Rama, gjatë një konference për shtyp me gazetarët është pyetur nga gazetarët nëse ekziston një urë komunikimi mes tij dhe kreut të demokratëve, Lulzim Bashës.
Në fjalën e tij, Rama deklaroi edhe njëherë se është i gatshëm të dialogojë në çdo moment me opozitën jashtë parlamentare, por vetëm me një kusht. Kryeministri theksoi se nuk negocion me “asgjë që lidhet më vullnetin e popullit të shprehur në votë”.
Ndër të tjera, kreu i qeverisë tha se ka shumë gjëra më të rëndësishme për të bërë, se sa të qëndrojë në pritje për Lulzim Bashën dhe Monika Kryemadhin, teksa shtoi se prioritetet e tij janë informaliteti dhe transformimi i bashkive të fituara.
“Sepse duhet të drejtojmë të gjitha bashkitë e vendit, dhe këtë barrë duhet ta mbajmë me dinjitet dhe sukses. Fokusi im nuk është kjo loja macja me miun, e atyre që zgjodhën një rrugë që për mua ka qenë e qartë që ditën e parë. Unë jua kam thënë. Kjo rrugë do t’ju çoj më keq se sa jeni. Të gjithë e kanë vendosur vetë. Në politikë, kur merr vendim, do marrësh dhe përgjegjësi. Jemi para një situate që s’ke me ke flet dhe s’ke për çfarë flet. Prioriteti im është informaliteti dhe transformimi i bashkive të fituara. S’jam më vetëm kryeministri apo kryetari i PS-së”, deklaroi Edi Rama.
