Kandidati i Partisë Demokratike, Lefter Maliqi, ka konfirmuar se do të marrë mandatin e deputetit në qarkun e Beratit. Sipas tij, politika ka nevojë për të dhe interesi i tij i vetëm janë qytetarët që e kanë votuar dhe mbështetur.
Ndër të tjera, në një intervistë për “Fax News”, ka zbuluar dhe krisjen midis tij dhe Lulzim Bashës, pasi ky i fundit e ka gënjyer në zgjedhet parlamentare të vitit 2017, duke i premtuar që do të ishte i pari në listën e PD-së në Berat, por me një kusht; që mos ta bënte zë me njeri.
“Basha më gënjeu për Bashkinë e Beratit, duke vendosur për kandidatin e PR-së, për shkak se donte të kandidonte Grida Dumën në Durrës, dhe jo Agron Dukën. Më pas Basha më premtoi që do të isha i pari në listën e PD-së në Berat, dhe më kërkoi që të mos ia tregoja këtë askujt.
Më pas më renditi të tretin dhe vuri Eduard Halimin të parin dhe Astrit Veliajn të dytin. Në zgjedhjet e 2017-tës dola në fushatë me Ramën, për shkak se lista e Lulit ishte qesharake, dhe sulmet ndaj LSI-së e dëmtuan më shumë PD-në.
Le të jetë kryemininstri Rama, unë nuk do i shqitem derisa të plotësohen nevojat e votuesve të mi”, tha më tej Maliqi.
Ndërkohë që nëse do të ishte në dorën e tij, Maliqi tha që zgjedhjet duhet të mbaheshin sa më parë. Gjithashtu, Maliqi është shprehur se vota e tij në Kuvend do të jetë kundër Ramës, ndërsa do të votojë pro vetëm në rastet kur diskutohet Kodi Zgjedhor, dhe interesat madhore të vendit.
“Unë e kam thënë edhe më parë, që politika ka nevojë për mua, dhe jo unë për politikën. Kam qenë në drejtim të policisë në komisariate të ndryshme të vendit, dhe derimë tani që mbaj postin e zëvendësdrejtorit të burgjeve. Këto problematika që ngre sot PD, e kanë zanafillën në vitin 2008, në kodin zgjedhor”, tha Maliqi.
