Prej 18 nëntorit, nuk lejohen më grumbullimet më shumë se 10 persona në ambjente të mbyllura dhe të hapura, si masë për të parandaluar përhapjen e Covid-19. Por Komiteti Teknik i Ekspertëve ka bërë një përjashtim, ndërsa i ka dhënë leje Kuvendit që të mblidhet këtë të enjte në seancë plenare, duke respektuar protokollet e vendosura nga ekspertët.
Kjo seancë plenare do të nisë ne orën 10:00, me një interpelancë urgjente të kryeministrit Edi Rama, kërkuar nga deputeti i opozitës Ralf Gjoni.
Po ashtu do të ketë edhe një interpelancë të Ministres së Shëndetësisë, Ogerta Manastirliu, thirrur nga një grup deputetësh.
Më herët, Komiteti Teknik i Ekspërtëve vendosi masa shtesë, për të parandaluar përhapjen e COVID-19 në Shqipëri. Komiteti Teknik vendosi të ndalohen grumbullimet me më shumë se 10 persona në vende të hapura dhe të mbyllura, të ndalohen mbledhjet partiake dhe tubimet, konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
