Enver Hoxha mburrej me forcën e ushtrisë shqiptare, dhe sulmonte shpesh me fjalë ”imperialistët” amerikanë.
Por këta të fundit zotëronin armë bërthamore, që mund t’i përdornin edhe kundër Shqipërisë komuniste në rastin e një Lufte të Tretë Botërore.
Kur Xhon Kenedi hyri në Shtëpinë e Bardhë në janarin e vitit 1961, ai nisi të shqyrtojë të gjitha planet e paraardhësve republikanë. Mes tyre ai zbuloi edhe një plan operativ, me një listë vendesh komuniste që do të goditeshin me armë bërthamore, në rastin e një lufte me Bashkimin Sovjetik.
Në një takim me Sekretarin e Mbrojtjes, Robert Meknamara, gjenerali Tomas Pauer i tha me humor: “Shpresoj të mos keni miq apo të afërm në Shqipëri, pasi thjesht ne duhet ta fshijmë nga faqja e dheut!”.
Meknamara u tmerrua nga kjo ide, kërkoi ndryshimin urgjent të këtij plani, gjë që u miratua edhe nga Kenedi. Shqipëria ishte në shënjestër, prej radarëve sovjetike të mbrojtjes anti-raketore në ishullin e Sazanit.
Veç 8 nëndetëseve bërthamore në Pashaliman, Moska synonte strehimin e 25 nëndetëseve të tjera në Gadishullin e Karaburunit. Planet u anuluan kur në gusht 1961, u prishën raportet e Tiranës me Moskën.
TIRANA TODAY
