Rama tha në emisionin “Open” se ka vetëm një ofertë për kryedemokratin Lulzim Basha, dhe ajo është 30 qershori, pra zhvillimi i zgjedhjeve lokale të vitit 2019 në datën e dekretuar nga Presidenti.
“Kam një ofertë shumë të qartë për opozitën, është 30 qershori. 30 qershori është detyrim dhe përgjegjësi për çdo parti politike që të dali e të dëgjojë vullnetin e popullit”, tha Rama.
Ndonëse krizën aktuale politike e konsideroi diçka të përsëritur, kryeministri veçoi një element të ri nga kriza e vitit 2017-të, kur opozita ngriti çadrën në bulevardin kryesor të Tiranës, me të njëjtat kërkesa. Sipas Ramës, ndryshimi në 2019-ën është se opozita ka një vendosmëri për t’i shkuar deri në fund rrugës ‘qorre’.
“Ndryshimi është në faktin se jemi në kushtet kur ka një vendosmëri për t’i shkuar deri në fund një rruge qorre, që në këndvështrimin tim është vetëvrasje politike. Dhe nga ana tjetër, thirrjeve për dialog dhe për të diskutuar pa kushte, i vjen e njëjta përgjigje e përsëritur pa pushim dhe destinuar që të mbetet një kllapë brenda së cilës ky grupim politik partish është i destinuar të tretet”, përfundoi Rama.