Blutë e Tiranës kanë prangosur kandidatin për deputet të LSI-së në zgjedhjet e 25 prillit, Etjon Joka, i cili akuzohet për “korrupsion aktiv” në zgjedhje. 32-vjeçari u shpall në kërkim nga Policia e Tiranës, dhe dosja në ngarkim të tij i kaloi Prokurorisë së Posaçme, SPAK.
Ai u filmua duke i dhënë 100 dollarë një qytetari, që ishte angazhuar të mblidhte vota për LSI-në. Në videon e publikuar nga një emision investigativ, Joka bisedonte me një qytetar që i thotë se ka bërë 100 vota.
Përgjimet
“Hajde një sekondë. Te puna si të ka shkuar? Të ka ecur çik? Ma jep dorën (i jep 100 dollarë), ma bë një drekë se unë s’vi dot”, i thotë Joka qytetarit.
“Një votë po ma humb më ngel hatri”, thotë ai. Ti merr lekët, më jep votën. Ata janë të moshuar ç’tu them unë atyre, ç’tu premtoj, tu jap lekët. Mos e ngri zërin se kemi kontrolle”, dëgjohet të thotë Joka në video.
Joka bisedon edhe me një qytetar që i thotë se ka bërë 100 vota, duke përfshirë edhe 12 që i ka bërë gruaja e tij.
