Presidenti Ilir Meta ka dalë sërish ditën e sotme në një konferencë për mediat për të dhënë një zgjidhje për krizën politike.
Meta ka ftuar partitë politike që të marrin pjesë në zgjedhjet e 13 tetorit, ndërsa i bëri edhe njëherë thirrje kryeministrit Rama për reflektim, në rast të kundërt, presidenti i kërkon mazhorancës që të mos i pengojë këto zgjedhje.
“Zgjedhjet e ligjshme shtetërore kushtetuese janë më 13 tetor. Arsyet pse unë kam dekretuar datën 13 tetor ju besoj se i dini. Ishte data më e afërt që mund të garantonte të gjithë përfshirjen e të gjithë forcave opozitare që do të kishin dëshirë të merrnin pjesë, ishte dhe data më e afërt dhe në prag të 17-18 tetorit. Kriza jonë nuk është thjesht një krizë vendore”, deklaroi Meta.
Nëse kjo datë zgjedhjesh, e dekretuar nga vetë Meta, do të pengohet, sipas tij do të ndikojë negativisht në hapjen e negociatave të Shqipërisë me Bashkimin Evropian.
“Kjo do të jetë një kosto mjaft serioze. Është një penalizim për çeljen e negociatave të Shqipërisë në tetor. E ftoj edhe njëherë kryeministrin Rama të reflektojë, të mos pengojë caktimin e dekretit për datën 13 tetor”, tha Meta.
Po ashtu, ai u shpreh se Gjykata Kushtetuesja është e vetmja që mund të gjykojë dekretet e firmosura nga Meta.
