Ish kryetari i Aleancës Kuq e Zi, Kreshnik Spahiu, komentoi në ‘Open’ deklaratën e prokurorit Ndoja ku tregonte se atentati i është bërë për shkak të detyrës. Ai tha se atentati ndaj prokurorit është bërë për shkak të dosjeve që ai heton.
“Prokurori tha se atentati i është bërë për shkak të detyrës. Por atentati i është bërë prokurorit për shkak të dosjeve që ai heton”, deklaroi Spahiu.
A është e ligjshme që këto dosje të dalin jashtë Prokurorisë?, e pyeti moderatorja Kreshnik Spahiun.
“Nuk është e ligjshme që dosjet të dalin nga Prokuroria, në qoftë se ai nuk është prokurori i atyre dosjeve. Në këtë pikë, Prokurori ka shkelur ligjin”, tha më tej ai.
Andi Maloku, shoferi i prokurorit Ndoja që me manovrat e tij i shpëtoi jetën ‘shefit’ gjatë atentatit të datës 1 nëntor, ndërroi jetë në Spitalin e Traumës.
I ndjeri mori dy plumba, një në shtyllë kurrizore dhe një në kraharor, teksa mundohej të nxirrte makinën nga rruga, ditën që Ndoja u sulmua nga dy kallashnikovë pranë mbikalimit të Shkozetit.
Të plagosur mbetën edhe prokurori Ndoja, bashkë me mikun e tij Landi Muharremi që ndodhej në të njëjtin automjet.
Atentatorët dyshohet se janë një skuadër vrasësish me pagesë. I vetmi që ndodhet pas hekurave në lidhje me këtë ngjarje është Redjan Rraja, i njohur ndryshe si “Dara” i Krujës, që është gjithashtu edhe nipi i deputetit të PS-së, Rrahman Rraja.
Vetë Rraja ka deklaruar se nuk ka marrë pjesë në atentat, dhe se ka alibi për vendndodhjen e tij në momentin kur është kryer atentati.
