Përgjatë 24 orëve të fundit në Shqipëri janë konfirmuar 28 raste të reja me COVID-19, duke e çuar kështu numrin total të të infektuarve në 174.
Raportohet gjithashtu se është rritur numri i fëmijëve të prekur nga koronavirusi në vendin tonë.
Eugena Tomini nga Instituti i Shëndetit Publik pohoi se mes të prekurve me koronavirus janë edhe 4 fëmijë: “Nga të prekurit, rezultojnë 4 raste pozitive të moshës pediatrike, kontakte të rasteve pozitive, janë pa shenja klinike dhe në gjendje të mirë shëndetësore”.
Eugena Tomini njoftoi sot se harta e personave të prekur është zgjeruar gjatë 24 orëve të fundit në Tropojë me dy persona të prekur.
Harta e të prekurve nga COVID-19 po ashtu është zgjeruar në Tiranë, Korçë, Fier, Durrës, Lezhë, Elbasan, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit.
Shpërndarja gjeografike e rasteve pozitive, është si vijon:
— Në Tiranë: 102 persona;
— Në Durrës: 10 persona;
— Në Lushnje: 4 persona;
— Në Elbasan: 5 persona;
— Në Rrogozhinë: 2 persona;
— Në Kavajë: 4 persona;
— Në Korçë: 11 persona;
—Në Vlorë: 5 persona;
— Në Shkodër: 3 persona;
— Në Lezhë: 4 persona;
— Në Has: 2 persona;
— Në Berat: 1 person;
— Në Krujë: 1 person;
—Në Tropojë: 2 persona.
Ministria njoftoi se gjatë orëve të mbrëmjes së djeshme ndërroi jetë një paciente 71-vjeçare nga Tirana, e shtruar në spitalin Infektiv, në terapi intensive, në frymëmarrje të drejtuar (respirator).
Po ashtu Tomini sqaroi se në shërbimin infektiv aktualisht janë 73 të shtruar dhe 3 prej tyre janë në terapi intensive, 2 prej të cilëve janë të intubuar në gjendje të rëndë.
