Ministria e Shëndetësisë ka mbledhur ditën e sotme Task Forcën e ekspertëve në lidhje me koronavirusi vdekjeprurës që po përhapet në Kinë dhe jo vetëm.
Ministrja Ogerta Manastirliu u ka kërkuar ekspertëve të marrin masat përkatëse në aeroportin e Rinasit.
“Me urdhër të posaçëm kam kërkuar të merren masat paraprake për rritjen e survejancës dhe të identifikohet shkalla e rrezikut. Nga raportimi i fundit që kam Shqipëria mbetet një vend me rrezik të ulët sa i takon depërtimit të koronavirusit nga Kina. Kemi gati planet e emergjencës. Masat janë në koordinim me OBSH. Kemi marrë masat përkatëse në aeroportin e Rinasit”, tha ajo.
Manastirliu shtoi se kemi një survejancë shumë të mirë të infeksioneve respiratore dhe laborator të standardizuar lidhur me vendosjen e diagnozës. Sipas saj, stafet janë të trajnuara në varësi të shkallës së rrezikshmërisë.
Numri i njerëzve të vdekur në Kinë nga koronavirusi ka shkuar në 81, me gati 3,000 raste të konfirmuara të sëmurë.
