Analisti Andi Bushati, i ftuar në ‘News24’ ka folur rreth aktualitetit politik, duke cekur në veçanti konfrontimin mes policisë, përmbaruesve dhe disa familjeve tek “Petro Nini” në kryeqytet.
Në rubrikën ‘Opinion’, Bushati tha se shqiptarëve e vetmja mënyrë për të fituar të drejtën e tyre u ka mbetur dhuna përballë pushtetit të parasë, si dhe shtoi që vendimi për shkarkimin e drejtorit të policisë së Tiranës duhet përshëndetur.
Sipas tij, të gjitha institucionet janë vënë në shërbim të të fortëve.
“Më vjen keq që e vetmja armë për të gjetur të drejtën ka mbetur dhuna. Imagjinoni sikur ata familjarë të kishin qëndruar të heshtur dhe të kishin ulur kokën. Nëse ata do thoshin s’kemi ç’bëjme, shtëpia e tyre sot do ishte prishur. Problemi është se pse duhet që në këtë vend, edhe gjykatat edhe polica, të gjitha institucionet janë vënë në shërbim të të fortëve. Është një masë që duhet përshëndetur shkarkimi i drejtorit të Policisë së Tiranë, pasi kur një institucion reagon është pozitive. Përtej reagimit pas faktit duhet parë edhe analiza që shkon më thellë. Pse policia u vu në shërbim të nxjerrjes jashtë të disa familjeve? Nëse këtu nuk përdor mjete ekstra ligjore ti mbetesh një njeri i shtypur. Ata në Kukës iu ul taksa në Rrugën e Kombit se i vunë flakën kabinave. Ata do paguanin 5 euro nëse nuk do kishin reaguar. Pse jetojmë në një shtet që ti duhet të bëhesh i dhunshëm që të fitosh të drejtën tënde. Mos vallë kjo është mënyra e vetme që i ka mbetur shqiptarëve përballë pushtetit të parasë?”, tha Bushati.
Bushati, ka komentuar edhe situatën Brenda opozitës, i cili u shpreh se deputetët e rinj të opozitës në Kuvend kanë të drejtën e tyre, por nuk mund të quhen opozitë e re.
“Do ishte anomali nëse deputetët do ishin të gjithë pro Bashës. Unë kam mbrojtur kauzën që opozita duhet të digjte mandatet. Ata kanë të drejtën e tyre të zënë atë vend në parlament. Nder apo turp ata e marrin vetë përsipër. Nuk mendoj se ata mund të quhen opozitë e re. Ata nuk janë opozita”, deklaroi Bushati.
