Policia italiane ka arrestuar dy shqiptarë mbrëmë në zonën e Firences. Në pranga kanë rënë një 25-vjeçar dhe një 33-vjeçar, të cilët u ndaluan pas një aksioni kundër lëndëve narkotike. Pas ndalimit, karabinierët konstatuan se shqiptarët mbanin një sasi droge prej 8 kg heroinë, vlera e së cilës llogaritet në 400 mijë euro.
Dyshimet e policisë janë shtuar pas veprimit të shqiptarit 25-vjeçar, i cili po drejtonte makinën tip ‘Fiat Punto’. Pas kontrollit, karabinierët gjetën të fshehur sasinë e drogës në një pjesë të makinës, e më pas kontrolli vijoi edhe në shtëpinë e 33-vjeçarit shqiptar, ku u gjet se e kishte kthyer në një laborator herione.
Pas heroinës, u sekuestruan edhe pajisjet të cilat shërbenin për ndarjen e sasisë në doza të vogla.
