Policia ka zbardhur detaje të reja nga plagosja me armë zjarri në Shkodër. Nga të shtënat me armë zjarri mbeti i plagosur 54-vjeçari Nikolin Huba. I plagosuri është ish-kryetar i Partisë Socialiste në Vaun e Dejës, ndërsa aktualisht është anëtar i Këshillit Bashkiak dhe punonjës në Hidrocentralin e Komanit. Ai është qëlluar me dy plumba në këmbë dhe ndodhet në spital, jashtë rrezikut për jetën. Autori është larguar me shpejtësi me një motor, menjëherë pas ngjarjes.
11:00/ Kërcet arma në Shkodër, plagoset një 54-vjeçar
Një plagosje me armë zjarri ka ndodhur këtë paradite në qytetin e Shkodrës. Nikolin Huba, rreth 54 vjeç, është personi që ka mbetur i plagosur, por fatmirësisht është jashtë rrezikut për jetën. Mësohet se 54-vjeçari ka marrë dy plumba në këmbë dhe është dërguar në Spitalin e Shkodrës.
Policia ndodhet në vendngjarje dhe po punon për identifikimin dhe kapjen e autorit. Burimet nga uniformat blu thonë se ngjarja ka ndodhur në afërsi të shkollës Pyjore, Shkodër, ku në rrethana ende të paqarta është plagosur me armë zjarri në këmbë, Nikolin Huba, 54 vjeç, banues Vau Dejës.
Njoftimi
Shkodër/Informacion paraprak
Më datë 04.09.2021, rreth 10:15, në afërsi të shkollës Pyjore, Shkodër, në rrethana ende të paqarta është plagosur me armë zjarri në këmbë, jashtë rrezikut për jetën shtetasi N. H., 54 vjeç, banues Vau Dejës.
Në vendngjarje kanë mbërritur menjëherë shërbimet e Policisë ku vijon krehja e zonës për kapjen e autorit.
Grupi hetimor nën drejtimine Prokurorisë ndodhet në vendngjarje dhe vijon punë për sqarimin e rrethanave dhe zbardhjen e ngjarjes.
