Këshilli Evropian jep në mars dritën jeshile për Shqipërinë dhe Maqedoninë e Veriut. Kjo ka qenë deklarata në një zë nga ana e kryeparlamentarit Gramoz Ruçi dhe kreut të grupit parlamentar të PS-së, Taulant Balla, nga samiti i PE për Ballkanin Perëndimor.
Gjatë takimeve u nënvizua se Parlamenti Evropian nuk tërhiqet nga pozicioni i palëkundur, për të filluar menjëherë gjatë presidencës kroate bisedimet me Shqipërinë dhe Maqedoninë e Veriut.
Në fjalën e tij në Samit, Ruçi ka shprehur mirënjohjen për mbështetjen e fuqishme që PE dhe personalisht Presidenti Sassoli u japin përpjekjeve të vendeve të rajonit, për t’iu bashkuar familjes evropiane. Ruçi rikonfirmoi vendosmërinë e Shqipërisë drejt destinacionit evropian. Ai tha se vendi ka vetëm një Plan A në rrugëtimin drejt të ardhmes, që është Bashkimi Evropian.
Ruçi u kërkoi kryeparlamentarëve të BE-së të bindin qeveritë e tyre, se Ballkani Perëndimor është një rajon evropian dhe jo kufitar me Bashkimin Evropian. Se kufijtë kulturorë të Evropës janë kufijtë e saj gjeografikë dhe se kufijtë politikë dhe ekonomikë ka ardhur koha të afrohen me ta, se Ballkani Perëndimor është një vlerë e shtuar dhe jo një problem i shtuar për Bashkimin Evropian.
Në të njëjtën linjë ka qenë edhe kryetari i Grupit Parlamentar të PS, Taulant Balla: “Shqipëria nuk është dekurajuar nga rezervat dhe skepticizmi i disa vendeve anëtare, të cilëve u është kërkuar që para se të shprehin qëndrimet e tyre, të vijnë në Shqipëri dhe të prekin nga afër rezultatet e problemet tona. Ne jemi të vendosur në destinacionin tonë europian dhe nuk kemi plan tjetër, as të hapur, as të fshehtë, as sot, as në të ardhmen”.
Denonco ne TT