Kritika të shumta kanë ardhur në drejtim të yllit të Paris SG, Neymar, pas një videoje të shpërndarë në rrjetet sociale ku braziliani godet me grusht një tifoz të Rennes pas humbjes në finalen e Kupës së Francës.
Duke ngjitur shkallët në “Stade de France” për të marrë medaljen e vendit të dytë, pak minuta pasi Paris SG u mund 6-5 me penallti (e gjithë ndeshja përfundoi 2-2), ai fillimisht e shtyu me dorë telefonin dhe më pas shkëmbyen fjalë. Por situata u tensionua dhe nga pamjet duket se Neymar e godet me grusht në mjekër.
Por ditët pas atij incidenti nuk kanë qenë aspak të qeta për tifozin e Rennes. Nelson, tifozi që u godit me grusht nga Neymar ka thyer heshtjen e tij. Ai ka folur për “L’Equipe” dhe ka treguar ngacmimet e marra, pasi iu bë publike adresa në rrjetet sociale.
“Për t’iu përgjigjur atyre, që më akuzuan se dua të fitoj para me këtë histori, saktësoj se nuk kërkoj asnjë qindarkë, zyrtarisht apo jozyrtarisht. Nëse vërtet do të kisha kërkuar të merrja para nga ky rast, Neymar do më kishte denoncuar menjëherë.
I vetmi person që kam vendosur të padis është kolumnisti Pierre Menes, për komentet që bëri ndaj meje. Ai mund të ketë marrë vetë para të pista për të mbrojtur interesat e një lojtari apo një klubi. As unë dhe as avokati im nuk kemi kontaktuar me PSG dhe Neymar. Unë nuk jam në shitje. Cilido kompensim i mundshëm nuk më mbush me lumturi. Çfarë më duhen këto para, nëse humb nderin tim?
Neymar met une pêche à un rennais pic.twitter.com/uXgU3R2l5Y
— Claude vaillant (@vaillant92100) April 27, 2019
Kërcënimet në shtëpi? Njerëzit e kanë shpërndarë adresën time në rrjetet sociale. Unë jam një person që e dua jetën, por nuk e kam braktisur shtëpinë, pavarësisht kërcënimeve. Vetëm këtë të enjte, katër persona erdhën dhe më kërcënuan, duke më thënë: “Herën tjetër, nëse merresh me Neymar, do të shohësh se çfarë do të të bëjmë. A kam keqardhje për këtë që ndodhi? Sigurisht, më vjen keq për fjalët që janë thënë, por nuk ishte provokim për Neymar. Isha në mesin e tifozëve, po qeshnim, ishim të ekzaltuar nga suksesi i skuadrës sonë.
Tani, sigurisht, kërkoj falje. Fjala vjen, Verratti dhe Buffon reaguan si zotërinj ndaj fjalëve të mia. Neymar nuk duhet të kishte reaguar ashtu, sepse është një profesionist. Kërkoj të takohem me të, që të mund t’i rregullojmë gjërat. Do t’i kërkoj falje dhe të shtrëngojmë duart. A mund ta imagjinoni, nëse unë do ta kisha goditur atë, si kundërpërgjigje?! A mund të imagjinojmë se çfarë do të kishte ndodhur?”
