Gjermania vlerësohet nga media për menaxhimin e mirë të situatës së krijuar nga Covid-19. Dhe kjo për arsye të forta. Rastet e reja për 1 milionë banorë, kanë qenë vazhdimisht më të ulëta se sa vendet e tjera të Evropës Perëndimore, dhe niveli i vdekshmërisë nga fillimi i pandemisë, ka qenë ndër më të ulëtit: aktualisht ka 0.15 vdekje për 1 milionë banorë, krahasuar me Francën 1.15 dhe Spanjën 2.19. Po çfarë po bën në fakt më mirë Gjermania? Katër janë shpjegimet kryesore për këtë sukses.
Fuqia e fatit
Gynter Froshl, mjek i mjekësisë tropikale në Universitetin e Mynihut, është drejtuesi i njësisë më të madhe të testimit për Covid-19 në Gjermani. Ai testoi 4 nga 5 pacientët e parë në fund të janarit. Në atë kohë, e fejuara e tij – një tjetër specialiste e sëmundjeve infektive – rastisi që të punonte në Breshia të Italisë, zona kryesore e shpërthimit epidemik më vdekjeprurës në Evropës nga Covid-19.
Të dy bisedonin çdo ditë në telefon, duke krahasuar shënimet, dhe Froshl arriti në përfundimin se arsyeja e vetme pse situata në të dyja vendet është aq e ndryshme, ishte diçka mbi të cilën që të dyja vendet nuk kishin kontroll mbi të.
“Ne në Gjermani patëm shumë fat”- thotë Froshl. Rastet e para të njohura me Covid-19 në Gjermani e kanë origjinën tek kompania “Webasto” që prodhon pjesë makinash në Mynih. Atje, një punonjës nga Kina – që rezultoi pozitiv me koronavirusin pasi u rikthye në shtëpi – infektoi disa të tjerë gjatë një vizite në Mynih.
Kur ajo njoftoi homologët e saj gjermanë për këtë gjë, kompania e informoi stafin, përfshirë një punonjës që megjithëse nuk kishte simptoma serioze, kërkoi të testohej. Fakti që ky pacient ishte i sinqertë, nënkuptonte që zyrtarët e shëndetit publik ishin në gjendje të identifikonin, gjurmonin dhe izolonin rastet e tjera.
Dhe në vend të një shpërthimi të madh dhe të heshtur epidemik, autoritetet shëndetësore ndaluan përhapjen e mëtejshme të virusit nga ajo vatër. Pati një element tjetër të fatit: Në Institutin e Mikrobiologjisë Bundesvehr në Mynih, ndodhet një laboratori me nivelin 3 të bio-sigurisë, pra që merret me agjentët shumë infektivë dhe vdekjeprurës që mund të përhapen përmes ajrit si SARS-CoV-2.
Kur Kina bëri publike sekuencën gjenetike të koronavirusit të ri në janar, kolegët e Freoshl
në institut bënë gati testet PCR për koronavirusin. Dhe nuk ishte vetëm Mynihu. Në Berlin, shkencëtarët krijuan kompletin e testit. Por Froshl thekson se nëse pacienti i parë do të ishte shfaqur në një pjesë më pak të përgatitur të vendit, rezultati mund të ketë qenë i ndryshëm.
Fuqia e të mësuarit
Sigurisht, çelësi për menaxhimin me sukses të koronavirusit nga Gjermania, ka të bëjë edhe me mësimin dhe veprimin si duhet mbi njohuritë e reja. Kur grupi i punëtorëve të “Webasto” u vu nën kontroll, Froshl dhe kolegët e tij nisën të vënë në zbatim ato që mësuan nga përvoja:hartuan protokollet për diagnostikimin, izolimin dhe trajtimin e sigurt të pacientëve me Covid-19.
Kur gjermanët filluan të ktheheshin nga pushimet e tyre dimësore nga Austria, Italia dhe vendet e tjera me shpërthime epidemike, ekspertët ishin gati. Por gjermanët mësuan edhe nga përvoja e vendeve të tjera.
“Ne u përpoqëm të kopjojmë strategjinë e Koresë së Jugut, Japonisë dhe Tajvanit, që të gjithë shembuj të mirë, se si një reagimi i shpejtë mund të zvogëlojë numrin e rasteve pozitive”- thotë Nikolai Savaskan, zyrtari kryesor i shëndetësisë në një departamenti lokal në Berlin.
Një pjesë e atij reagimi të shpejtë:Programi i testimit masiv. Ndërsa Gjermania u mbyll shpejt, ajo shtoi në të njëjtën kohë testimet që nga fillimi i pandemisë, dhe pastaj e përshtati vazhdimisht programin për t’iu përgjigjur ndryshimeve në dinamikën e epidemisë. Për shembull pas rritjes të rasteve ditore gjatë verës, laboratorët në të gjithë vendin rritën kapacitetet e tyre testuese. Nga maji deri më sot, Gjermania kaloi nga rreth 60.000 teste në 160.000 testime në ditë.
Fuqia e reagimeve lokale
Gjermania, një vend federal i përbërë nga 16 lande me rreth 400 departamente komunale të shëndetit, pati një përgjigje të lokalizuar ndaj koronavirusit. Edhe pse kjo ndonjëherë ka çuar në disa politika konfuze, kjo do të thotë gjithashtu se qeveritë komunale mund të veprojnë shpejt dhe t’i përshtatin politikat pandemike sipas nevojave dhe sfidave me të cilat përballen popullatat lokale.
Kjo mund të jetë një arsye tjetër për suksesin e Gjermanisë, krahasuar me fqinjët me sisteme më të centralizuara si Franca, Spanja dhe Britania e Madhe . “Qasja e decentralizuar për menaxhimin e pandemisë, ishte mbase një mënyrë e mirë për t’u përballur me një situatë që ndryshon shpejt”- thotë Savaskan i Berlinit.
Kështu në fillim të pandemisë në muajin mars, Berlini vendosi t’i mbyllë baret dhe klubet e natës përpara rajoneve të tjera, pasi ato ishin burime lokale të infektimit. Kur u rihapën në qershor, autoritetet shëndetësore komunale ishin në kontakt të vazhdueshëm me industrinë për t’i inkurajuar ato të bashkëpunojnë në gjurmimin e kontakteve. “Ne kemi një normë të gjurmimit të kontakteve më të lartë se 90 për qind”-thekson Savaskan, që shton se gati të gjitha kontaktet e njerëzve të infektuar po identifikohen dhe po ndiqen.
Fuqia e të dëgjuarit të shkencëtarëve
Që nga momenti kur koronavirusi u shfaq në Gjermani, autoritetet gjermane kanë qenë të afta të dëgjojnë shkencëtarët, thotë Klemens-Martin Vendtner, mjek i mjekësisë së brendshme me banim në Mynih. Ai thotë se politikanët vendas bënë diçka që tani duket si një koncept i huaj në SHBA:Ata dëgjuan shkencëtarët.
“Çdo informacion që kishim nga spitali, ia dërgonim autoriteteve që të bazoheshin mbi të për nxjerrjen e udhëzimeve të reja”- thotë ai. Prandaj, Gjermania vendosi politikën e përdorimit të detyrueshëm të maskave në hapësirat publike në pranverë dhe mbylli shkollat. Kjo është arsyeja pse Jens Shpan, ministri federal i Shëndetësisë, u tërhoq nga ideja e ‘pasaportave të imunitetit’ ndaj Covid-19 pasi dëgjoi shkencëtarët.
Sigurisht, shkenca nuk ka qenë e lirë nga politika as në Gjermani. Dhe në garën për të gjetur një pasardhëse për Merkelin, politikanët nëpër lande e kanë përdorur sigurisht pandeminë për të rritur profilin e tyre. Por tendenca në përgjithësi është se publiku u besoi politikanëve gjermanë “pasi ata nuk gënjyen në fillim” dhe ndoqën këshillat e shkencëtarëve, duke mos i hedhur ato poshtë.
Burimi i lajmit: https://www.vox.com/21495327/covid-19-germany-coronavirus-cases-deaths
Përshtatur nga TIRANA TODAY
