Mjeku toksikolog, Lulzim Banushi ka folur për gjendjen e nxënësve të gjimnazit “Janaq Kilica”, të cilët u shoqëruan në spital me shenja helmimi.
Në një prononcim për mediat, mjeku dha më shumë detaje në lidhje me situatën, teksa thekson se në përgjithësi rastet nuk ishin të rënda.
Sipas tij, rastet ishin nën mesataren (jo intoksikuar rëndë), ndërsa shton se jo të gjithë pacientët e paraqitur ishin të intoksikuar.
“Nxënësit kanë pasur simptoma si lotim i syve, kolla, me vështirësi në frymëmarrje, por në tërësi rastet nuk kanë qenë të rënda. Janë raste nën mesataren, jo intoksikuar rëndë. Kjo është një lloj lënde që jep efekte negative tek rrugët e frymëmarrjes, si lotimi i syve, teshtima etj. Por janë simptoma që nuk kanë rrezik për jetën. Jo të gjithë pacientët e paraqitur ishin të intoksikuar, për arsye se një pjesë e tyre ishin edhe me shqetësime psiko-emocionale, gjendje stresi dhe ankthi, ndoshta të krijuara edhe nga momenti. Pacientët kanë probleme me gjendjen psiko-emocionale dhe duhet të qetësohen deri në fund”, tha doktori.
Në lidhje me këtë situatë foli edhe drejtoresha e Spitalit Rajonal të Fierit, Nevila Shuke. Ajo tha se në spital janë paraqitur rreth 60 pacientë, 14 prej të cilëve janë akoma nën monitorim nga mjekët.
Nevila Shuke deklaroi se janë marrë të gjitha analizat toksologjike dhe janë çuar për ekzaminim pranë institucioneve përkatëse.
“Nxënësit e parë në Spitalin e Fierit janë paraqitur rreth orës 11.00. Janë paraqitur 30 nxënës. Më pas ka vazhduar numri tek 50 nxënës dhe 10 rastet e fundit kanë ardhur më shumë me simptoma ankthi dhe gjithsej janë afërsisht 60 pacientë, 2 mësuese dhe 58 nxënës. Aktualisht 14 nxënës janë në monitorim. Gjithë stafi i Spitalit Rajonal të Fierit ka qenë i angazhuar për përballimin e situatës. Gjendja e 14 nxënësve që janë në monitorim tanimë është shumë e mirë, ata janë jashtë rrezikut për jetën dhe për situatën.
Janë marrë të gjitha analizat toksologjike nga instancat e tjera dhe se situata po shikohet nga afër, si në rastin e parë ashtu edhe në rastin e dytë. Janë çuar të gjitha ekzaminimet laboratorike pranë institucioneve përkatëse, të cilat do nxjerrin përfundimet e gjithë situatës”, tha ajo.
