Nuk ka zgjatur shumë shoqërimi i kreut të PD-së Luan Baçi, i cili la drejtorinë e policisë së Tiranës. Por siç denoncoi ai, djalin Bruno Baçin përveç se policia e ka goditur, ndodhet ende në polici ku po merret në pyetje.
Luan Baçi: Me Fierin kanë dy javë që e kanë zënë këtë punë. Filluan që me protestën e të premtes dhe të shtunës, me ardhjen e zotërisë së tij të vetëquajtur Kryeministër se tani nuk është më. E kanë filluar me shoqërime të shumë qytetarëve fierakë, sot mund të kenë bërë mbi 100 persona të shoqëruar në Fier, për ti penguar në protestë.
Por lidhur me incidentin e fundit, pas mbarimit të protestës mua më kanë ardhur shumë telefonata, sa kisha hipur në makinë për të ikur, telefonatat ishin të shumta. Përballë UET dëgjoja zhurmë, reprezalje dhe qytetarë nga Fieri që më thoshin po na marrin forcërisht, me dhunë po na fusin në makinë punonjës policie me uniformë dhe pa uniformë. Qytetarë që ishin për protestë.
Në moment kam drejtuar makinën drejt vendit ku më thanë protestuesit, shkoj atje dhe shikoj një kaos të vërtetë. Përleshje, policë me kapuç në kokë dhe vetëm sytë kishin jashtë, po i fusnin në makinë forcërisht. Ndalova makinën, djalin e kisha në makinë dhe i thashë dil jashtë dhe filmo me telefon. Vetë u futa te policia, u prezantova dhe u them pse i merrni forcërisht qytetarët fierakë. Absolutisht nuk dëgjonte njeri. Në moment kthej kokën dhe pashë djalin të gjakosur, policia e kishte mbërthyer për ta futur në makinë.
Nuk tregonin kush e goditi. Djali u tha, ju e dini, se ju erdhët bashkë me të dhe ai e goditi, të tjerët e mbajtën. Morën djalin e hipën në makinë. Hipa dhe vetë në makinë për të shoqëruar djalin. Këtu pastaj më shoqëruan dhe mua, kanë bërë dhe raport shërbimi për kundërshtim të forcave të rendit për ti dalë të keqes para.”
Ish-deputeti demokrat tha se e ka të dokumentuar në video personin që i goditi djalin.Një mesazh ai pati dhe për shefin e qeverisë Edi Rama, i cili sipas tij përmes këtij terrori po shton më shumë inatin e qytetarëve.
Luan Baçi: Është në video personi që ka gjuajtur, ka vajtur dhe i ka marrë telefonin një studenti që rri në trotuar. Tani po vazhdojnë me manipulimet e tyre, marrin urdhra politikë. Frika i ka hyrë në palcë këtij zotërisë dhe mendon se me reprezalje, me terror, me dhunë, me terror ndaj gjithë qytetarëve fierakë dhe nga gjithë Shqipëria mendon se do të na frikësojë për të mos marrë pjesë në protestë.
Harron që më shumë po e shton inatin, më shumë po na jep shkas për të protestuar dhe ta dijë mirë se nga Fieri do ti ketë të përditshëm në protestë në Tiranë me qindra, me mijëra, edhe në Fier. Në Fier do të shpallet person i padëshiruar.
Djali vazhdon akoma në polici, kërkojnë të manipulojnë situatën pasi duan të shpëtojnë këtë bastard polic. Është i dukshëm në kamerë, vete drejt Bruno Baçit, i merr telefonin nga dora me dhunë dhe duke e gjuajtur. Pastaj policia e merr dhe ai ikën.”
Baçi nuk kishte një numër të saktë të të shoqëruarve nga Fieri, por tha se janë ndaluar dhe persona të sëmurë.
Luan Baçi: Nuk e di numrin e të shoqëruarve. Di që është një me mbiemrin Delibashi, është nga Fieri dhe i sëmurë. E kanë marrë forcërisht dhe e kanë dhunuar. E kam gjetur duke u përleshur me policinë. Nuk besoj se kanë vend në biruca për të na futur të gjithëve në burg. Unë do të jem prapë këtu, do të vi në protestë me gjithë qytetarët fierakë. Nuk do të ndalemi asnjë sekondë.”
Baçi sqaroi edhe pozicionin e tij.
“Jam nën hetim, më nxorën në gjendje të lirë. Po pres për protestuesit e tjerë të shoqëruar, të paktën ato nga Fieri për të cilët mbaj pëërgjegjësi që kanë ardhur”.
