Ish-Ministri i Financave, Arben Malaj, thotë se grabitja e parave në aeroportin “Nënë Tereza” është një ngjarje që dëmton rëndë imazhin e vendit për investitorët e huaj.
Malaj shprehet se klasifikimi i rrezikut për të investuar në vendin tonë, do të rritet më shumë tashmë që kemi të bëjmë me një ngjarje të përsëritur brenda një periudhe të shkurtër kohore.
Arben Malaj sqaron se paratë që bankat dërgojnë jashtë kufijve, janë të siguruara në kompani të sigurimit dhe, pikërisht këtu do të rriten kostot e tërthorta për sistemin bankar në vend. Sipas tij, agjencitë që sigurojnë vlerat monetare do të shtojnë primin e sigurimit.
Për të bërë pagesat nga një llogari bankare e një banke në Shqipëri te një tjetër bankë në Shqipëri, transferta bëhet fillimisht në formë dixhitale, e më pas bankat bëjnë shkëmbimin fizik të parave.
“Transfertat janë një proces i natyrshëm. Për çdo ngjarje kompanitë e sigurimit jashtë Shqipërisë do të kërkojnë një prim më të lartë sigurimi ndaj kompanive shqiptare”, shtoi Malaj.
