Pas vendimit të qeverisë së Prishtinës për të vendosur reciprocitetin për targat e automjeteve serbe që hyjnë në territorin e Kosovës, janë ngritur një sërë pakënaqësish e revoltash. Intelektualja dhe sociologia e njohur serbe, Vesna Peshiq, ka thënë se është çuditur përse në vendin e saj po bëhet problem çështja e targave të Kosovës, kur Kosova është e pavarur.
“Nuk e di pse serbët e bëjnë problem vendosjen e targave të Kosovës, kur shqiptarët në Serbi duhet të vendosnin targat serbe. Kosova është e pavarur, pavarësisht nëse është anëtare e disa organizatave ndërkombëtare”, ka shkruar ajo në një postim në Twitter.
Qeveria e Kosovës, dje nisi me zbatimin e reciprocitetit për targat, duke vënë targa të përkohshme për mjetet me targa të Serbisë që hyjnë në territor të Kosovës.
Kjo ka shkaktuar radhë të gjata automjetesh në anën serbe të kufirit, dhe një protestë të banorëve lokalë. Kryeministri i Kosovës, Albin Kurti, u shpreh i vendosur për të zbatuar reciprocitetin me Serbinë.
Brukseli reagoi me anë të zëdhënësit Peter Stano. Ai kërkoi që të dyja palët të ndalin menjëherë tensionimin e situatës, dhe të garantojnë lëvizjen e lirë, që sipas tij është një kusht themelor i BE-së.
