Deputeti Halit Valteri është shprehur i shqetësuar sot në Kuvend, se asnjë nga shtëpitë e dëmtuara nga tërmeti nuk është ndërtuar. Gjatë seancës së sotme plenare, deputeti u shpreh se ai nuk ka ardhur për show në Kuvend, por për të kërkuar llogari për strehimin e shqiptarëve. Valteri u tregua mjaft i prerë në fjalën tij, ndërsa tha se aktualisht jemi në projektin 3D, ndonëse po bëhet një vit gati nga tërmeti shkatërrimtar që shkaktoi viktima, të lënduar dhe dëme të konsiderueshme materiale.
“Ju falenderoj. Folët për shpërndarje buxheti, për projekte, thatë se sot keni filluar. Shikohet se në Tiranë merret leje, dhe në disa muaj e shikon kullën në kat të 13 ndërsa ne për 1 vit jemi akoma të projekti 3 D.
Asnjë nga shtëpitë nuk është ndërtuar. Më shumë kanë ndërtuar Elvis Naçi, Ahmed Kalaja dhe Arbër Hajdari, se sa qeveria me 1.2 miliardë dollarë.
Ju nuk e dini se sa pallate sot janë në gjendje të pabanueshme. Në Durrës janë 3 mijë e 300 banesa të pabanueshme, kjo shifër nuk ka ndryshuar që sot e 1 vit me parë.
Në Tiranë e në Lezhë po ashtu, bilanci është i njëjtë. Ma jepni mua se i ndërtoj unë, se ju nuk po i ndërtoni dot, të tjerët po ndërtojnë shtëpi me para borxh dhe ju nuk po i bëni dot.
Ai me siguri nuk e di shifrën, se ata që ja çojnë nuk ja çojnë të sakta. Nuk po vij këtu të bëj show, as të zihem me Ben Ahmetaj. Po vij që t’ju them dilni rrugëve dhe shihni çfarë hallesh kanë njerëzit. Ju keni ngatërruar detyrat, në vend që ti shërbeni shqiptarëve keni detyrë ti zhvasni”, tha deputeti.
