Gjatë ditëve të fundit është vënë re një shtim i rasteve në spitale. Infektimet janë në shifra të frikshme, ndërsa ekspertët çdo ditë e më shumë po apelojnë për respektimin e masave, për të mos sjellë një tjetër izolim. Nga ana tjetër, Ministrja e Shëndetësisë Ogerta Manastirliu, foli për një skenar të mundshëm në rast mbingarkese të sistemit shëndetësor. Në fjalën e marrë në Parlament, ajo parlajmëroi se nëse nuk respektohen masat, do të përballemi me kushtet se kush do të trajtohet i pari.
“Ndaloni përdorimin politik të Covid, pandemia nuk është futboll politik. Pandemia është përdorur edhe pa ardhur rasti i parë në vendin tonë. Ne nuk jemi ndalur për asnjë moment punën në këtë kohë shumë sfiduese.
Stafet tona kanë 8 muaj që rrezikojnë jetën. Është fenomen i përhapur ai që përmend dhe kritikon kreu i OBSH. Ping pongu politik është sporti, lojën që ka nisur ende pa filluar pandemia.
Sot flasim për kapacitete, por më herët i kanë bërë thirrje Kavajës çohuni se do ju sjellin karantinën. Nuk po flas për testet, se vendosin objektiva të pavlerësuara nga pikëpamja shkencore.
S’duan ta kuptojnë se vendimet e qeverisë janë të bazuara nga komitete ekspertësh. Strategjia e vjeshtë-dimrit përfshin numrin e rritjes së testimeve. Nga qershori deri më sot është 4 fishuar numri i testeve. Strategjia jonë përfshin dhe rritjen e numrit të stafeve.
Kjo luftë kërkon bashkëpunimin e qytetarëve, ndaj e gjithë sakrifica të mos shkojë kot, çdo qytetar duhet të respektojë vendosjen e maskës dhe higjenës personale. Unë e di që qytetarët presin gjithmonë diçka të re.
Qeveria po përgatitet për të përballuar çdo skenar, ndaj masat që jemi duke ndërmarrë sa i përket parandalimit, shkojnë në këtë drejtim, për të siguruar që të mundemi të frenojnë pandeminë nëpërmjet respektimit të rregullave.
Nëse do kemi mbingarkesë të spitaleve, do të përballemi me vështirësi dhe do zgjedhim kush do trajtohet i pari. Akti normativ që do kalojmë sot jo vetëm mbështet qytetarët por drejton vëmendjen drejt zbatimit të masave, që nuk është gjoba qëllimi parësor, por ka ardhur momenti që ne të bëjmë më të mirën tonë që se sollëm ne dhe as qeveria. Beteja e parë që duhet të fitojmë është ajo shëndetësore”, tha ajo.