Kreu i Shtetit Ilir Meta nuk i ka ndalur thirrjet për ngritjen e popullit në protestë në 2 mars. Sipas Metës, është koha që sovrani të thotë fjalën e tij dhe të shpëtohet shteti nga pengmarrësit e pushtetit.
Presidenti i Republikës Ilir Meta, ka ftuar qytetarët në bulevardin “Dëshmorët e Kombit” në një manifestim në mbrojtje të Kushtetutës, dhe kundër asaj që ai e quan “grusht shteti”.
Sipas tij, nëse ka ardhur koha për revolucion, atëherë kjo do të ndodhë. Ai ka ritheksuar shpesh se Shqipëria ndodhet në një situatë ku të gjitha institucionet janë kapur nga mazhoranca qeverisëse, dhe se ai nuk do të mbajë sehir, por do të ndërhyjë për të parandaluar thellimin e krizës.
Meta shprehet i vendosur se nuk do të lejojë kryeministrin Rama, madje edhe ndërkombëtarët që të përdhosin Kushtetutën.
Statusi
Çdo qytetar i vendit tonë duhet të kuptojë se kriza e tmerrshme institucionale, ekonomike e shoqërore, si dhe rritja e pasigurisë për të ardhmen, buron nga mungesa e ndërgjegjësimit tonë si shoqëri për domosdoshmërinë e mbrojtjes së Kushtetutës nga politikanët që për më shumë pushtet i venë kazmën themeleve të shtetit, si përmes ndërhyrjeve të nxituara dhe jo transparente, ashtu edhe përmes bërjes së ligjeve anti-kushtetuese që minojnë sundimin e Kushtetutës dhe shtetit ligjor, siç është bërë traditë sidomos në vitet e fundit.
Është koha që Sovrani të thotë fjalën e tij ndaj këtyre puçistëve që nxjerrin ligje për të shkelur dhe dhunuar Kushtetutën e Republikës. Është koha të shpëtojmë shtetin e të gjithë shqiptarëve nga pengmarrësit e pushtetit! Ndaj në 2 mars zëri juaj duhet të dëgjohet si asnjëherë tjetër.
#PërKushtetutën?? #PërRepublikën?? #PërShqipërinë?? #PërKombin??
