Pesë muaj pas ngjarjes së rëndë, ku u vetëflijuan në banesën e tyre në Kombinat Anisa dhe Zhaneta Josifi, ekspertët kanë vëzhguar çdo mesazh të shkëmbyer mes tyre, të mbijetuarës Blerta Josifi dhe personave të tjerë.
Por bëhet me dije se nuk kanë gjetur asgjë. Edhe me rikuperimin e mesazheve apo bisedave të fshira, është vërtetuar se dy motrat dhe nëna e tyre, prej më shumë se një viti nuk komunikonin me askënd në telefon. E ndërsa bisedat e bëra para më shumë se një viti, nuk kanë bërë që ekspertët të dalin në përfundimin se dikush i çoi drejt vetëflijimit.
Ekspertiza mjeko-ligjore e trupit të dy viktimave, ka përcaktuar si shkak të vdekjes të Zhaneta dhe Anisa Josifit mos-ushqyerjen. Të treja anëtaret e familjes Josifi besonin në ringjallje dhe vendosën të vetëflijoheshin.
Sipas ekspertizës, Anisa kishte rreth 15 muaj që kishte humbur jetën, dhe ishte mumifikuar nga e ëma dhe motra e saj, me shpresën se një ditë do të ringjallej, ndërsa disa ditë më parë kishte ndërruar jetë dhe vetë Zhaneta.
“Ritualit fetar” mundi t’i mbijetonte vetëm Blerta, 34 vjeçare. Kjo e fundit nuk ka mundur dot që ti japë lamtumirën nënës dhe motrës së saj, për shkak të gjendjes emocionale dhe mendore në të cilën gjendej.
Ceremonia mortore është kryer në qytetin e Përmetit, aty ku familja Josifi kishte origjinën, dhe ku prehej dhe kryefamiljari, që po ashtu kishte ndërruar jetë përmes vetëflijimit.
Ngjarja e rëndë u denoncua nga daja i vajzave, i cili u shqetësua për shkak se e motra nuk i kishte hapur telefonin.
